Ова откритие станало основа за нејзиниот документарец за „Hulu“, насловен „Мојот дедо Чарлс Менсон“, во кој таа го истражува своето потекло и го поставува прашањето: „Потекнувам од убиец. Кој, по ѓаволите, би ме прифатил?“

Сличности меѓу таткото и озлогласениот дедо

Во разговор за „The Guardian“, Медокс објаснила дека нејзиниот татко Даниел Аргуелес бил зачнат за време на кратка врска. Таа смета дека неговата мајка можеби се сомневала во идентитетот на биолошкиот татко, но никогаш не му ја споделила таа информација.

Според зборовите на Софија, нејзината баба сопствениот „срам и гнев“ ги насочувала кон Аргуелес. Таа растела слушајќи ги приказните на својот татко за тоа како никогаш не го запознал својот татко и не знаел кој е тој. Кога вистината конечно излегла на виделина, Аргуелес речиси два месеци не можел да ѝ го признае тоа, бидејќи, како што рекол, „сè било премногу мрачно“.

Претворањето на тоа откритие во документарец за Медокс било речиси природен следен чекор. Таа вели дека пораснала прилично изолирано и осамено и дека раскажувањето за сопствените искуства отсекогаш ѝ било начин да го разбере светот околу себе.

Документарецот прави и некои паралели меѓу Менсон и Аргуелес, кои не се само физички. И двајцата биле родени од многу млади мајки, а и двајцата пораснале без присуство на татко. Додека Менсон голем дел од младоста го поминал во поправни установи, Аргуелес како дете бил испратен во воено училиште за превоспитување.

Медокс истакнува и сличности во нивните животни искуства, како трауми од детството, проблеми со менталното здравје и нагли промени во расположението кои, според неа, се појавувале кај двајцата.

Расчистување на семејната траума

Медокс вели дека документарецот на крајот помалку се занимавал со самиот Менсон, а повеќе со последиците од траумата која се пренесувала низ нејзиното семејство. Таа смета дека насилството и деструктивното однесување не се пренесуваат преку гените, туку дека врз луѓето силно влијаат искуствата низ кои поминуваат.

Коавторката и режисерка на документарецот, Александра Ортон, објаснила дека сакале да избегнат прикажување на Менсон како некаков „натприроден“ злосторник. Според нејзините зборови, важно е да се разбере дека тешки злосторства не прават некоја друга „врста“ луѓе, туку личности кои исто така се дел од општеството.

Филмот го прикажува и нерешениот однос меѓу Софија и нејзиниот татко. Тие двајца не разговарале откако завршило снимањето. Аргуелес, кој исто така се занимава со филм, ја поддржал нејзината одлука да го истражува нивното семејно минато пред камерите, но се прашувал дали целиот процес ќе ѝ донесе олеснување.

Чарлс Менсон, кој го предводел култот одговорен за убиствата на актерката Шерон Тејт и уште неколку лица во Лос Анџелес во август 1969 година, починал во затвор во 2017 година на 83-годишна возраст.

Медокс се надева дека со текот на времето повторно ќе се поврзе со својот татко. Таа верува дека документарецот би можел да му помогне да разбере дека, и покрај сите трауми, тој не ѝ пренел само болни делови од минатото, туку и сила.

„Се надевам дека се чувствува разбрано“, порачала таа.