Новиот документарец на Нетфликс, „A Toxic Love Story“, кој ќе биде објавен на 22 јули (денес) повторно се навраќа на истрагата што покажа дека ситуацијата не била ни приближно толку едноставна како што изгледала на почетокот.

Филмот го следи случајот на Хедли, која во 2016 година била обвинета дека преку интернет ја прогонувала новата сопруга на својот поранешен партнер Иан Дијаз. Поради овие обвиненија таа поминала четири месеци во затвор, пред истрагата да добие неочекуван пресврт.

Апсење и обвиненија

Полицијата во Анахајм, Калифорнија, во 2016 година ја уапсила тогаш 29-годишната Мишел, откако била обвинета дека со месеци преку интернет ја вознемирувала новата сопруга на своето поранешно момче Иан Дијаз. Истражителите првично верувале дека станува збор за јасен случај на опседната поранешна партнерка, која ја заплашувала сопругата на Дијаз со стотици електронски пораки.

Пораките биле испраќани под псевдонимот „Lilithistruth“, а документарецот се занимава и со значењето на тоа име, кое се појавувало како потпис на заканувачките пораки. За време на полициската интервенција во неговиот дом, Дијаз, според наводите во обвинението, изјавил дека неговата поранешна девојка треба да заврши „во е*ени лисици и во тапацирана соба“.

Но, како што напредувала истрагата, почнале да се појавуваат детали што ја довеле во прашање првичната верзија на настаните.

Кој всушност е жртвата?

Новата крими приказна базирана на вистински настани на Нетфликс премиерно ќе биде прикажана на 22 јули, а пред гледачите го поставува прашањето што се провлекува низ целиот случај: кој е жртвата, а кој сторителот?

На почетокот изгледало дека одговорот е едноставен, но понатамошната истрага целосно ја искомплицирала приказната и ја замаглила границата меѓу вината и невиноста. Авторите на филмот намерно ги оставаат гледачите во неизвесност, без да ги откријат клучните детали, за да можат да го следат развојот на случајот и неговите пресврти без однапред да го знаат исходот.

Кој стои зад документарецот?

„A Toxic Love Story“ се вклопува во понудата на Нетфликс со „true crime“ документарци кои истражуваат случаи во кои првичната верзија на настаните со текот на времето целосно се менува. Режисерка на филмот е Ема Сапл, позната по работата на проектите „4 Days“ (2021) и „Frontline“ (1983), додека продуценти се Дов Фридман, Чарли Расел и Сем Хобкинсон.

Во официјалниот опис на филмот се наведува дека дејството се одвива во „гламурозно предградие на Калифорнија“, каде што апсењето на млада жена поради наводно планирање насилен чин прераснува во голем скандал. Како што напредува истрагата, се откриваат слоеви на измама и предавство, а останува отворено прашањето кој во целата приказна е вистинската жртва, а кој негативец.