Начинот на кој го полните мобилниот телефон може значително да влијае врз трајноста на неговата батерија. Експертите предупредуваат дека две чести грешки можат да го забрзаат нејзиното трошење и да го скратат животниот век на уредот.
Многу корисници забележуваат дека нивниот мобилен телефон по една или две години повеќе не може да издржи цел ден без дополнително полнење.
Евтини полначи
Една од најчестите грешки е користењето непроверени и евтини полначи.
Од компанијата „Apple“ веќе подолго време предупредуваат дека неоригиналните или несертифицираните адаптери можат да претставуваат безбедносен ризик, но и негативно да влијаат врз работата на уредот.
„Полнењето со несертифицирани адаптери може да претставува ризик од повреда или смрт“, се наведува во упатствата на „Apple“.
Поради тоа, се препорачува користење оригинални или сертифицирани полначи, кои се прилагодени на уредот и ги исполнуваат сите безбедносни стандарди.
Полнење до 100 проценти
Уште една навика што може да го скрати животниот век на батеријата е нејзиното полнење до максимални 100 проценти.
Иако многумина сметаат дека тоа е најдобро за телефонот, експертите објаснуваат дека батеријата при целосно наполнет капацитет е под дополнително оптоварување, што со текот на времето може да го забрза нејзиното абење.
Поради тоа, се препорачува, кога и да е можно, полнењето да се прекине пред батеријата да достигне 100 проценти.
Како оптимална граница често се наведуваат околу 95 проценти, бидејќи на тој начин може да се придонесе за подобро зачувување на капацитетот на батеријата на подолг рок.
Малите промени во начинот на полнење можат да помогнат батеријата на вашиот телефон подолго да ги задржи добрите перформанси и значително да го продолжи животниот век на уредот.
