Сопственик на „Ferrari 488 GTB“ од Кина покрена правна постапка против родителите на децата кои неговиот скап автомобил го користеле како тобоган и на тој начин го оштетиле.
Инцидентот се случил кон крајот на мај во градот Кунминг, во покраината Јунан, во југозападна Кина. Четири деца од соседството, наводно помлади од 10 години, забележале црвен „Ferrari 488 GTB“ паркиран на отворен простор, а неговата аеродинамична силуета ја разбудила нивната љубопитност.
Како што се гледа на снимките од безбедносните камери што се појавија на социјалните мрежи, момчињата се качиле на автомобилот, направиле кратка пауза на ветробранското стакло, преминале на покривот, а потоа го користеле задното стакло како тобоган, пред нивното внимание да го привлече V8 моторот што се наоѓал под него. Исто така, се чини дека ја допирале каросеријата со долги бамбусови прачки.
Кога сопственикот се вратил од службено патување, наводно затекнал длабоки гребнатини на хаубата, покривот, задните светла и прозорците на возилото, како и напукнат преден браник.
Говорејќи за локалните медиуми, сопственикот открил дека не го однел суперавтомобилот во сервис на „Ferrari“, бидејќи проценил дека поправката би чинела повеќе од 100.000 јуани (14.700 долари). Наместо тоа, посетил локални автолимарски работилници и се одлучил за aftermarket делови, што резултирало со значително помала сметка од 29.360 јуани (4.300 долари).
Секако, сопственикот ги однел сметките во полициската станица, каде што во два наврата се сретнал со родителите на децата кои ја предизвикале штетата. Меѓутоа, според „South China Morning Post“, родителите понудиле само 5.000 јуани (730 долари) како обесштетување и не ги довеле децата да се извинат. Тоа довело до тоа сопственикот на „Ferrari“ да ги прекине преговорите и да покрене граѓанска тужба, барајќи го целосниот износ за поправката.
Според кинескиот закон, децата помлади од 14 години се изземени од административен притвор, што го остава граѓанскиот судски систем како единствен начин сопствениците на имот да бараат одговорност од нивните законски старатели.
„Ferrari 488 GTB“ е опремен со twin-turbo V8 мотор кој развива 670 коњски сили, а се произведуваше меѓу 2015 и 2020 година, заменувајќи го моделот „458 Italia“, пред неговото место да го преземат моделите „F8 Tributo“ и електрифицираниот „Ferrari 296 GTB“. Според зборовите на сопственикот, кога бил нов го платил 3,6 милиони јуани (530.000 долари) и дотогаш никогаш немал ниту една гребнатина.
Денес
