„Worst Neighbor Ever“ е антологиска документарна серија која длабоко навлегува во четири различни случаи, во кои секојдневните соседски расправии прераснале во малтретирање, заплашување и смртоносно насилство. Сите четири епизоди од првата сезона, зад кои стои продукциската куќа „Blumhouse“, веќе се достапни на „Netflix“ и брзо се најдоа меѓу најгледаните содржини.

Преку сведоштва на очевидци, разговори со претставници на полицијата и снимки од полициски телесни камери, серијата раскажува неверојатни, но вистинити приказни за обични луѓе чии животи биле уништени поради соседи од пеколот. Морничавите сцени се дополнети со анимирани реконструкции, а режисерка е Синтија Чајлдс, која работеше и на серијата „Worst Ex Ever“.

Што се случува во серијата?

Првата епизода, „Конечно пукна“, нè води во Кентаки, каде што преселбата на Шона Скот и нејзиниот сопруг Дејвид се претвора во вистински пекол. Нивната нова сосетка, Френсис Зајер, која воедно е и нивна долгогодишна семејна пријателка, започнува кампања на малтретирање што завршува со трагедија.

Френсис започнува вистинска војна со лажни обвинувања и постојани повици до полицијата. Сè кулминира кога таа доаѓа вооружена со пиштол пред нивниот дом, го убива Дејвид и пука во лицето на Шона. Подоцна е осудена на 35 години затвор.

Втората епизода, „Колапс на Средниот Запад“, ја следи приказната на Монсерат Ширли (Монси) од Индијана. По разводот, во нејзиниот дом се вселува новото момче, Марк Леонард. На 10 ноември 2012 година, двајцата намерно предизвикуваат експлозија во куќата со цел да ја наплатат полисата за осигурување.

Во експлозијата загинуваат нивните соседи, Дион и Џенифер Лонгворт, десетици луѓе се повредени, а повеќе од 30 куќи се уништени, засекогаш менувајќи го животот во мирното предградие.

Третата епизода, „Плаши се од својот сосед“, е сместена во Оукланд, Калифорнија. Мајлс и Мелина Армстед купуваат куќа за да го прошират своето семејство, но нивниот сосед Џамал Томас, откако неговото семејство било иселено, започнува да ги тероризира.

И покрај бројните пријави до полицијата, малтретирањето постојано ескалира. По пет месеци закани и кршење прозорци, семејството решава да се исели. Додека Мајлс го средувал дворот за да ја подготви куќата за продажба, Томас го застрелал и го убил.

Четвртата епизода, „Извршителот“, открива сложена измама во Шерман Оукс. По анонимна дојава за исчезнувањето на 70-годишниот Чарлс Вајлдинг, детективот Марк О’Донел започнува истрага.

Трагите го водат до Каролајн Херлинг, која тврди дека управува со имотот на Вајлдинг додека тој е на патување. Истрагата открива дека Вајлдинг починал од природна смрт, а Херлинг го расчленила неговото тело за да ја прикрие смртта и да продолжи да го користи неговиот идентитет за финансиска корист.

Поделени критики

Реакциите за серијата се поделени.

Во позитивната рецензија, порталот „Decider“ им препорачува на гледачите: „ГЛЕДАЈТЕ!“ Во рецензијата се наведува:

„’Worst Neighbor Ever‘ ја завршува својата работа преку добра комбинација од директно раскажување, ефикасно градење на напнатост и визуелен стил каков што недостасува кај повеќето серии од овој жанр.“

Посебно е пофалена употребата на анимирани реконструкции, кои се оценети како „освежувачка промена на темпото во овој жанр“.

Од друга страна, рецензијата на „The Guardian“ е значително покритична. Серијата е оценета како „експлоататорска“, а приказните како „ужасувачки“.

Авторката Луси Манган смета дека „огромните, драматични и трауматични настани што ги обележале животите на луѓето лесно се сведуваат речиси на ништо поради барањата на медиумите“.

Таа ја критикува серијата поради недостатокот на подлабока анализа, истакнувајќи дека е пропуштена можноста да се истражат системските проблеми, како што е можната расна пристрасност во реакцијата на полицијата во случајот на семејството Армстед.

Рецензијата заклучува дека серијата не поставува важни прашања, туку само ги повикува гледачите „да зјапаат, да покажуваат со прст и да шепотат“.

И покрај критиките, емоционалната тежина на приказните е неспорна. Во последната сцена од првата епизода, Шона Скот низ солзи се присетува на својот убиен сопруг Дејвид.

„Имаше насмевка што можеше да ја осветли секоја просторија“, вели таа.

„И не го заслужи ова.“