Робот-полицаец од Охајо потрошил 128.080 долари, а за една година не фатил ниту еден прекршител

Неговите оператори, очекувано, останале без трпение. Весникот „The Columbus Dispatch“ известува дека Полициската управа во Даблин, град во американската сојузна држава Охајо, минатиот месец го повлекла од употреба својот механички борец против криминалот, со прекар „DubBot“, откако градот заклучил дека роботот, како што дипломатски било соопштено, „не ги исполнува нивните оперативни потреби“, изјавил портпаролот на полицијата.

Машината, која по форма потсетува на огромен сообраќаен конус што проголтал џиновско јајце, претставува автономен безбедносен робот од моделот K5, произведен од компанијата „Knightscope“, со седиште во Калифорнија.

Висок нешто повеќе од метар и половина и тежок околу 180 килограми, роботот нема раце ниту нозе во класична смисла, туку се движи на две тркала, поради што многумина го споредуваа со Далеците од франшизата „Doctor Who“.

Можеби не е баш Робокап, но неговата намена била да помага во спречување криминал така што ќе ја надгледува околината со камери што снимаат во сите правци и ќе им овозможува на граѓаните да користат копче за итни повици.

За овој потенцијал во борбата против криминалот, градот платил 67.548 долари, што е приближно колку годишната плата на просечен полицаец.

Роботот во јули 2025 година добил релативно лесна задача – да патролира во локална паркинг-гаража. Меѓутоа, не постигнал речиси ништо. Освен што не придонел за ниту едно апсење, кривичен предмет или издавање казна, роботот исто така не забележал ниту еден инцидент што би барал интервенција од човечки полицајци, наведе портпаролот на полициската управа.

Градот бил блиску до тоа да потроши уште повеќе пари на својот несмасен борец против криминалот. Првичниот план бил на компанијата „Knightscope“ да ѝ се платат 238.440 долари за распоредување два роботи во Даблин во текот на две години, но вториот робот никогаш не бил пуштен во употреба.

Полициската управа на крајот за еден робот потрошила вкупно 128.080 долари, но од компанијата „Knightscope“ ќе добие поврат на средства во износ од 60.533 долари.

Ова не е првпат робот да биде „отпуштен“. Всушност, се чини дека ботовите на компанијата најчесто завршуваат на насловните страници поради лошо извршување на работата и расфрлање со парите на даночните обврзници.

Озлогласениот поранешен градоначалник на Њујорк, Ерик Адамс, во 2023 година потпиша договор за распоредување K5 ботови во градското метро, но тие беа пензионирани неколку месеци подоцна, откако се покажаа како толку бескорисни што бараа постојана придружба од човечки полицајци.

Минатиот месец, уште еден робот, овојпат задолжен за патролирање на Меѓународниот аеродром во Сан Антонио, беше „отпуштен“ поради низа технички проблеми, како неможност да се движи по права линија или да им обезбеди на вработените функционален видео и аудио-пренос во живо.