„Honda“ ја претстави освежената верзија на моделот „N-Box“, најпродаваниот автомобил во Јапонија.
Три години по пристигнувањето на актуелната генерација, популарниот кеи автомобил доби редизајн, нови пакети на опрема и унапредувања во кабината.
Најголемите промени ги носи верзијата „N-Box Custom“, која сега има поагресивен преден дел со нов браник, потесна маска на ладилникот и редизајнирани LED светла.
Авантуристичкиот „N-Box Joy“ доби нов пакет „Black Style“ со затемнети надворешни детали, додека светлата за магла сега се дел од стандардната опрема.
Тука е и верзијата „Fashion Style“, која се издвојува со бел покрив, бели ретровизори и бели рачки на вратите.
Во внатрешноста се додадени нови декоративни елементи, амбиентално осветлување и попрактични детали како USB приклучок и дополнителни џебови на седиштата.
Поголем број верзии сега стандардно добиваат и 9-инчен мултимедијален екран со навигација.
Под хаубата нема поголеми промени. „N-Box“ го задржува бензинскиот мотор од 660 кубни сантиметри, со 58 коњски сили во атмосферската верзија и 64 коњски сили во турбо изведбата.
Погонот може да биде на предните или на сите четири тркала, во комбинација со CVT менувач.
Продажбата на освежената „Honda N-Box“ во Јапонија започнува во јули 2026 година, додека нарачките ќе бидат отворени од 22 јуни.
Почетната цена изнесува околу 9.400 евра, додека најскапата верзија чини 13.400 евра.
Моделот останува еден од главните конкуренти на возилата како „Suzuki Spacia“, „Daihatsu Tanto“ и „Nissan Roox“.
