Актерот Џорџ Клуни се приклучил на една од најголемите дебати годинава во филмскиот свет – кој ќе го отелотвори Џејмс Бонд. Гласините за тоа кој актер ќе го замени последниот Бонд, Даниел Крег, достигнуваат врв, додека многумина ги истакнуваат и набројуваат своите фаворити.
Меѓу оние кои најмногу се истакнуваат се актерите Арон Тејлор-Џонсон, Харис Дикинсон и Џејкоб Елорди, додека Клуни се насочил кон уште еден голем фаворит. Станува збор за актерот Калум Тарнер, со кого оскаровецот соработувал на историската драма од 2023 година, „The Boys in the Boat“.
„Се надевам дека Калум на крајот ќе биде следниот Бонд. Мислам дека би бил одличен Бонд. Висок е, згоден, шармантен и Британец, така што е совршен тип за тоа“, изјавил познатиот актер за „The Hollywood Reporter“. И не застанал тука со пофалбите за својот колега — ги пофалил и неговите избори во кариерата, како и неговиот професионален подем.
„Не сакаше само да заработи лесни пари – работеше навистина интересна работа. Некако, Калум успеа да се пробие низ целата таа врева и да најде место каде што луѓето го гледаат и велат: ’Има нешто во овој млад човек.‘ Возбудливо е да гледаш како луѓето велат: ’Овој тип – тоа е типот што сакам да го следам и на кого сакам да му обрнувам внимание‘“, истакнал Клуни.
Меѓу другото, Клуни зборувал и за тоа како патот до статусот главен актер станал поинаков во денешната индустрија.
„Како постар човек можам да кажам дека е интересно колку денес тоа е потешко отколку порано. Едноставно е потешко. Разговарајте со кој било голем продуцент или голем режисер. Тие постојано се прашуваат: ’Кој е сега главниот актер? Кој е тој?‘“, продолжил Клуни.
Затоа, за него вистинскиот избор е Тарнер.
„Не можам да го објаснам тоа, но знам кога ќе го видам тој квалитет“, заклучил тој.
Самиот Тарнер, кој изминатиот викенд се венчал со пејачката Дуа Липа, неодамна се огласил за шпекулациите дека тој е новиот Бонд.
„Знам колку и вие – навистина, знам колку и вие“, изјавил тој исто така за „The Hollywood Reporter“. На прашањето дали би бил заинтересиран за улогата доколку му биде понудена, „се насмеал и погледнал во своите патики“. Потоа додал: „Нема да го коментирам тоа“.
Но продолжил: „Ќе ти кажам што е толку смешно во врска со Бонд: дури и најдобрите пријатели те прашуваат, луѓе со кои не си разговарал 10 години ти праќаат пораки – а ти не знаеш ништо! Толку е чудно што нешто се случува, а всушност ништо не се случува. Навистина не знам ништо. Само ми е прилично забавно“, заклучил Тарнер.
