Сепак, Реј Чарлс Робинсон, како што всушност му било името, немал живот како од бајките, иако многумина живееле бајка танцувајќи на неговите хитови.

Го изгубил видот на седум години

Роден во многу сиромашно семејство, во раното детство на Реј Чарлс се случил трагичен настан што ќе му го одбележи животот. Неговиот помлад брат се удавил, а оттогаш младиот Реј почнал да го губи видот и на седумгодишна возраст останал целосно слеп.

Потоа заминал на Флорида во училиште за слепи и глуви лица, каде што се образувал и научил да свири на инструменти како пијано, оргули, саксофон, кларинет и труба. Во тој период неговите музички правци опфаќале широк спектар – од госпел, преку кантри, до блуз.

По смртта на мајка му, Реј го напуштил училиштето и почнал да патува и да настапува, што го привлекло вниманието на локалните клубови.

Иако на почетокот ги имитирал Нет Кинг Кол и Чарлс Браун, со текот на времето развил сопствен стил, а поширока популарност стекнал кога потпишал договор со сопственикот на дискографската куќа „Atlantic Records“. Тогаш настанале и неговите први хитови: „Mess Around“, „I Got a Woman“ и „I Love Her So“.

Го сменил името

Меѓутоа, во тоа време постоела една голема пречка – кога почнал да гради кариера, на боксерската сцена веќе постоела ѕвезда со истото име.

Тогаш одлучил наместо Робинсон да се претставува само со своето име и средно име, па така настанало името Реј Чарлс.

Но, ниту тука не завршиле пречките. Во тоа контроверзно време, на многу критичари не им се допаѓало што Реј ја спојувал црковната музика со, како што ја нарекувале, „ѓаволската“ музика, па често бил етикетиран како „безбожник“.

Подоцна јавноста се смирила и ја препознала генијалноста и талентот на овој музичар. Реј Чарлс станал „татко на соул музиката“.

Најголемиот успех го постигнал токму со „Hit The Road Jack“, за која во 1960 година добил и награда Греми.

Борба со пороците

Славата и успехот, за жал, го одвеле музичарот и во канџите на пороците – во 1964 година бил уапсен на аеродром поради недозволени супстанции, по што заминал на лекување на клиника. Сепак, се зборувало дека никогаш не успеал целосно да излезе од маѓепсаниот круг на наркотиците.

Неверен во браковите

Кога станува збор за љубовта, се женел двапати и добил 12 деца со девет различни жени. За жал, неговите проблеми со хероинот создавале огромни проблеми во неговите врски.

Исто така, за време на вториот брак паралелно имал шестгодишна љубовна врска со колешката Марџи Хендрикс, со која подоцна добил и син.

До крајот на животот живеел бурно, а почина на 10 јуни 2004 година во својот дом на Беверли Хилс, на 73-годишна возраст. Причина за смртта биле компликации предизвикани од заболување на црниот дроб.