И покрај градската мрежа на метро и автобуси, многу жени не сакаат да бидат видени во свечена облека како се држат за рачките додека патуваат на романтичен состанок. Наместо тоа, бараат нивните додворувачи да им платат превоз, а ако тоа не се случи, состанокот се откажува, пишува „New York Post“.

Откажала состанок затоа што не сакал да ѝ плати превоз

Овој навидум дрзок ултиматум предизвика вистинска лавина од коментари на интернет, а сè поттикна Савана Пањоци, инфлуенсерка од Њујорк. Таа откри дека откажала состанок затоа што мажот одбил да испрати автомобил по неа. „Едно од моите правила е, ако мажот барем не понуди да ти испрати автомобил за состанокот, без разлика дали ќе го прифатиш тоа или не, од состанокот нема ништо!“, порача таа во вирално видео. „Не. Апсолутно не. Тоа не го правиме“.

Пањоци им објаснила на своите следбеници дека прифатила да излезе со маж кого случајно го запознала во градот. Меѓутоа, кога тој одбил да ѝ нарача превоз за нивната договорена средба, закажана за дождлива вечер минатата недела, сè тргнало наопаку и таа го откажала состанокот.

Следувала лавина критики

Нејзините високи стандарди предизвикаа бројни негативни реакции.

„Ве молам, престанете да го нормализирате ваквото однесување. Тој плаќа вечера. Добар маж нема да го трпи тоа“, остро порача еден коментатор. „Паметен човек. Само што заштеди пари за вечера и превоз“, се надоврза друг, прашувајќи се: „Зошто кој било маж би бил должен да ви плати превоз? Зошто вие жените мислите дека мажите се банкомати и дека треба постојано сè да плаќаат?“.

Подеднакво збунет маж праша: „Да ти испрати автомобил? Која си ти, принцезата Дајана?“. Еден шегаџија ѝ порачал: „Ти предвидувам многу мачки во иднина“.

Критики пристигнаа и од жени. „Побарај го Бог и терапија“, напиша една. „Проблемот е што СЕ ПОДРАЗБИРА дека мажот автоматски треба да го направи тоа. Што е тој, твој возач или батлер? Дами, ве молам, бегајте од ваква содржина“. Друг додаде: „Чувството дека нешто ти следува е опасно. Избегна куршум. Звучиш како една од оние жени што само сакале бесплатна вечера“.

Некои жени се согласуваат со неа

И покрај критиките, Пањоци доби поддршка и од други жени кои исто така бараат приватен превоз за состаноци. „Ова беше моето правило број 1 додека живеев во Њујорк. Нема превоз, нема состанок“, напиша една жена под нејзината објава.

Контроверзната расправа за плаќањето превоз се придружува на сè подолгиот список љубовни проблеми што во последните години ги делат мажите и жените, од судири околу поделбата на сметката во ресторан до расправии околу тоа дали мажите треба да испраќаат пораки за потврда на состанокот.

Ова е незавидна ситуација за самците, особено за оние во Њујорк, кој неодамна беше прогласен за град во кој е најверојатно самците да умрат сами.

Сепак, жените кои инсистираат нивните додворувачи да им обезбедат превоз не се откажуваат. „Некои мажи нема да ви понудат ни да ве одвезат дома по состанокот“, напиша креаторката на содржини Катарина во описот на своето видео. „Други ќе ве додадат на својот „Uber“ профил. Бирајте мудро, дами“.