Новата видеоигра за Џејмс Бонд, „007 First Light“, која ја развива реномираното данско студио „IO Interactive“, официјално излегува дури на 27 мај 2026 година, но веќе успеа сериозно да ја разбранува јавноста во регионот.

Воведното видео, кое ги прикажува првите тринаесет минути од играта, откри детал што стана вирална тема на социјалните мрежи – најпознатиот таен агент во светот, Џејмс Бонд, проговори црногорски.

Спорна сцена на Исланд

Сцената што предизвика реакции кај гејмерите се одвива во база на Исланд. Младиот Бонд влегува во просторија преку прозорец, а зад грб му приоѓа маскиран војник и му се обраќа на српски јазик:

„Стигна, каде беше досега?“

Агентот 007, со забележлив странски акцент, одговара:

„Опушти се, пристигнувам за секунда.“

Веднаш потоа, од централата на „MI6“, женски глас на англиски го прашува:

„Ти зборуваш српски?“

На тоа Бонд самоуверено ја поправа својата претпоставена:

„Црногорски, научив неколку фрази додека планинарев таму“, одговара тој.

За да нема забуна, официјалните титлови во играта исто така го наведуваат јазикот како „Montenegrin“.

Овој дијалог веднаш предизвика лавина коментари на форумите и социјалните мрежи ширум Балканот, каде јазичните прашања често имаат и голема политичка тежина.

Бонд за новата генерација

Одлуката на девелоперите конкретно да го наведат јазикот како црногорски не е случајна, туку се вклопува во нивната поширока визија за создавање целосно оригинална приказна за потеклото на славниот шпион.

„007 First Light“ го претставува Бонд како 26-годишен, неискусен и понекогаш непромислен регрут во програмата за обука на „MI6“.

Студиото „IO Interactive“, познато по популарниот серијал „Hitman“, уште од почетокот нагласуваше дека сака да создаде Бонд за модерната публика – лик чиј целосен систем на вредности се разликува од оној на Шон Конери, па дури и од Даниел Крег.

Мартин Емборг, наративен директор на играта, истакна дека нивниот Бонд „не е диносаурус“ и дека женските ликови ќе бидат третирани „како ликови“, а не како обични објекти.

Во тој контекст, лингвистички детал како признавањето на црногорскиот јазик може да се гледа како дел од обидот да се создаде помодерен и послоевит свет кој ги одразува денешните геополитички и културни реалности, наместо потпирање на застарени стереотипи.

Со тоа, играта свесно навлегува во чувствително подрачје, но истовремено покажува амбиција да понуди свежа интерпретација на лик стар повеќе од шеесет години.