Нивното враќање во тричлен состав доаѓа откако во март оваа година најавија повторно обединување и ја објавија новата песна „Club Song“, пишува „People“.

Настап во црвен латекс

Членките на групата со модниот избор ги потсетија обожавателите на раните 2000-ти, периодот кога „The Pussycat Dolls“ беа една од најпознатите поп-групи во светот. Никол Шерцингер (47) носеше црвен латекс комбинезон со долги ракави и висок околувратник.

Кон крајот на настапот се појави и во бел дуксер со качулка на кој пишуваше „Don't you wish your girlfriend was hot like me“, стих од нивниот најголем хит „Don't Cha“.

Ешли Робертс и Кимберли Вајат, кои имаат 44 години, исто така носеа црвени латекс комбинации. Робертс имаше долен дел во стил на бикини, додека Вајат беше во кратки шорцеви. И двете стајлингот го дополнија со ракавици и чизми до колена.

Триото на сцената го изведе хитот „Don't Cha“, а им се придружи и раперот Баста Рајмс.

Дваесет години подоцна

„Неверојатно е. Мислам дека тоа беше нашиот прв настап во 2006 година и лудо е да се помисли дека поминаа 20 години. Баста Рајмс е легенда“, изјави Шерцингер пред доделувањето.

„Го обожаваме. Минатиот викенд имав неколку настапи со него во странство и секогаш е чест повторно да се најдеме на иста сцена“, додаде таа.

Шерцингер истакна и дека враќањето со Робертс и Вајат има посебно значење за неа.

„А да бидам со моите девојки во оваа нова фаза, како жени какви што сме денес, и да бидеме светилник на надеж, радост и сила за сите – тоа ни е важно. Тоа денес ни е потребно повеќе од кога било и тука сме за да ѝ го дадеме тоа на публиката“, порача таа.

Се вратија без три поранешни членки

На Шерцингер, Робертс и Вајат не им се придружија останатите поранешни членки на „The Pussycat Dolls“ – Џесика Сута, Мелоди Торнтон и Кармит Бачар.

Бачар во изјава објавена на Инстаграм на 17 март тврдеше дека не била известена за одлуката повторно да се активира групата. Претходно овој месец беше откажана и северноамериканската турнеја, а засега е потврден само еден настап.

Триото треба да настапи на фестивалот „Outloud Music Festival“ за време на прославата „WeHo Pride“ во Лос Анџелес.

Група што ја одбележа поп-сцената на 2000-тите

„The Pussycat Dolls“ е американска женска поп-група која најголемата популарност ја стекна во средината на 2000-тите. Се прославија со хитот „Don't Cha“, по што следуваа песните „Buttons“, „Stickwitu“, „Beep“, „I Don’t Need a Man“ и „When I Grow Up“.

Групата беше позната по спојот на поп, R&B и танцови настапи, како и по впечатливата кореографија и провокативниот имиџ. Во најпознатиот состав беа Никол Шерцингер, Ешли Робертс, Кимберли Вајат, Џесика Сута, Мелоди Торнтон и Кармит Бачар.