Ви се случува мобилниот интернет да ви се потроши многу побрзо од очекуваното, иако не гледате видеа ниту користите апликации што трошат многу ресурси?

Проблемот често не се големите работи како „YouTube“ или „Netflix“, туку опциите што незабележливо работат во позадина на телефонот.

Разни апликации и системски функции секојдневно можат да трошат мобилни податоци без воопшто да сте свесни за тоа.

Автоматско ажурирање на апликации

Една од најчестите причини е автоматското ажурирање на апликациите.

Телефонот често сам презема нови верзии на апликациите веднаш штом станат достапни, дури и кога користите мобилна мрежа.

Социјалните мрежи, игрите и поголемите апликации на тој начин можат да потрошат стотици мегабајти без никакво предупредување.

Решението е едноставно — поставете ажурирањата да се извршуваат само кога сте поврзани на „Wi-Fi“.

Кај „Android“ уредите оваа опција може да се најде преку „Google Play Store“, во делот за автоматско ажурирање на апликации, додека кај „iPhone“ поставката се наоѓа во опциите на „App Store“.

Автоматско зачувување фотографии

Голем потрошувач на интернет може да биде и автоматското зачувување фотографии и видеа на „cloud“ сервиси како „Google Photos“ или „iCloud“.

Ако е вклучено испраќање датотеки преку мобилна мрежа, секоја нова фотографија веднаш се прикачува онлајн.

Доволно е во поставките да го исклучите користењето мобилни податоци за „backup“, па прикачувањето ќе се извршува само преку „Wi-Fi“ конекција.

Синхронизација на апликации во позадина

Тука е и синхронизацијата на апликациите во позадина.

Апликации како е-пошта, календар или социјални мрежи постојано проверуваат нови известувања и податоци, што значи дека интернетот работи дури и кога телефонот активно не го користите.

Оваа опција може да ја ограничите или целосно да ја исклучите преку поставките за синхронизација на сметките.

Локација во позадина („GPS“)

Уште еден скриен потрошувач е локацијата на телефонот.

Многу апликации, вклучувајќи „Google Maps“, временски прогнози и социјални мрежи, постојано следат каде се наоѓате.

Освен што троши батерија, оваа функција користи и мобилни податоци.

Најдобро е пристапот до локацијата да го дозволите само додека користите одредена апликација.

Со неколку мали промени во поставките може значително да ја намалите потрошувачката на интернет и да избегнете непријатни изненадувања кога пакетот со мобилни податоци ќе ви исчезне прерано.