Научниците ги идентификуваа двата грбави китови кои во одделни случаи преминале меѓу Австралија и Бразил, на оддалеченост од околу 14.500 километри, што претставува нов рекорд за овој вид.
Китовите биле препознаени по карактеристичните ознаки на опашките на две локации оддалечени околу 9.000 милји, односно 14.500 километри. Се движеле во спротивни насоки и поминале поголема оддалеченост од кој било досега забележан грбав кит.
„Тоа е многу редок настан, но е навистина прекрасен показател за тоа колку се распространети овие животни“, рече Филип Клепам, поранешен раководител на програмата за истражување на китови на „NOAA“, кој не беше вклучен во студијата. Грбавите китови се познати по своите долги миграции низ огромните океани, главно по патеките што ги учат од своите мајки. Тие се хранат со крил и мали риби во текот на потоплите месеци и се размножуваат во тропски води во зима.
Во новата студија, истражувачите анализирале повеќе од 19.000 фотографии од китови направени во текот на изминатите четири децении, собрани од истражувачки групи и граѓански научници. Софтверот за препознавање помогнал во идентификувањето на животните според нивните бои и назабените рабови на нивните опашки.
Еден кит поминал нешто повеќе од 9.300 милји, или 15.000 километри, надминувајќи ги претходните носители на рекорди, вклучувајќи го и грбавиот кит кој пливал од Колумбија до Занзибар. Наодите беа објавени во вторник во списанието „Ројал Сосајети Опен Сајанс“ (Royal Society Open Science).
Бидејќи фотографиите го покажуваат само почетокот и крајот на патувањето, научниците не ја знаат точната рута по која се движеле китовите. Коавторката на студијата, Стефани Стак, од Пацифичката фондација за китови, изјави: „Наоѓањето не на една, туку на две единки што преминале помеѓу Австралија и Бразил го доведува во прашање она што мислевме дека го знаеме за тоа колку се навистина одвоени овие популации“. Научниците додаваат дека ваквите методи би можеле да помогнат во следењето на промените во движењата на китовите, бидејќи климатските промени ги загреваат океаните и ги менуваат областите каде што живеат крилите и каде што китовите се хранат и се размножуваат.
