Кон крајот на минатата година, Маск прифати спогодба со поранешни директори на „Twitter“ и со илјадници поранешни вработени во социјалната мрежа, која во меѓувреме ја преименуваше во „X“. Спогодбата следуваше откако со години се обидуваше да избегне каква било исплата.

Потоа, во март, го загуби спорот против инвеститори на „Twitter“, кои го тужеле тврдејќи дека ги довел во заблуда со своите јавни изјави за време на преземањето на компанијата.

Истиот месец, судија ја отфрли и неговата тужба против огласувачите кои решиле да ја напуштат платформата. Во мај, друг судија ги поништи одлуките на „Doge“, владино тело за намалување на трошоците кое Маск помогнал да се основа и го водел минатата година.

Судот утврдил дека намалувањето на одредени субвенции било „училишен пример за неуставна дискриминација врз основа на ставови“.

Маск има практично неограничени финансиски средства

Се поставува прашањето дали Маск, по уште еден медиумски експониран пораз – овојпат во случајот против „OpenAI“ – ќе стане помалку склон кон конфликти.

„Никој не е непобедлив“, вели Шубха Гош, адвокатка и професорка по право на Универзитетот „Syracuse“.

Сепак, таа предупредува дека веројатно ќе бидат потребни многу поголеми загуби за Маск да се повлече или да го промени својот агресивен пристап кон судските битки.

„Тој, на многу начини, е само уште еден претприемач што ги брани своите права“, вели Гош.

„Не мислам дека го злоупотребува правниот систем, но не сум сигурна дека го користи ефикасно“, додава таа.

Освен склоноста кон неконвенционални потези, Маск располага и со практично неограничени финансиски ресурси.

Со оглед на неговиот удел во „SpaceX“, една од неговите компании за која се очекува наскоро да излезе на берза, Маск е на пат да стане првиот билионер во светот.

Токму неговото огромно богатство го прави малку веројатно тоа дека дури и серија порази, поврзаните трошоци или казни ќе го одвратат од нови судски битки и тужби.

„Тој прави што сака“

„Не гледам дека ќе запре“, изјави Дороти Лунд, адвокатка и професорка на Правниот факултет при „Columbia“.

„Изгледа дека досега никој не успеал да му наметне вистински последици, ниту нему ниту на неговите постапки“, додаде таа.

Како пример ја посочува неодамнешната казна од 1,5 милиони долари што му ја изрече Американската комисија за хартии од вредност и берза („SEC“) затоа што навреме не го пријавил купувањето акции на „Twitter“.

За некого како Маск, таа сума е речиси занемарлива.

Кога судија во декември 2024 година го поништи неговиот платен пакет вреден милијарди долари во „Tesla“, Маск едноставно повторно ја регистрирал целата компанија во Тексас и обезбедил од акционерите одобрување за потенцијално уште поголем пакет.

„Тој прави што сака и понекогаш само добива малку по прсти. Зошто тогаш би се менувал?“, прашува Лунд.

Маск ќе се жали на вчерашната пресуда

Маск вчера ја критикуваше пресудата во случајот со „OpenAI“, пишувајќи на „X“ дека таа создала „слободен премин за ограбување добротворни организации ако грабежот успеете да го држите во тајност неколку години“.

Дополнително, судијата во случајот го нарече „ужасен активист“ и најави жалба на пресудата.

Гош додава дека Маск има личност „поголема од животот“, што го издвојува од повеќето бизнис-лидери.

Се чини дека проценил дека е вистински момент „SpaceX“ да излезе на берза токму во периодот на медиумски експонираното судење против Алтман – негов поранешен штитеник, кој подоцна му станал ривал и јавен непријател.

Веќе самата таа ситуација го издвојува од повеќето деловни луѓе.

Кога компанија се подготвува за излегување на берза, нејзините челници обично влегуваат во таканаречен „период на тишина“.

Станува збор за период пропишан од „SEC“, за време на кој директорите на компанијата што се подготвува за јавна понуда на акции треба да се воздржат од одредени изјави.

Многу директори тогаш зборуваат што е можно помалку, бидејќи дури и општи изјави за растот на компанијата најчесто се забранети.

„Не знам дали и кога тоа ќе му се удри од глава“

Лунд забележува дека малкумина можат да се споредат со Маск кога станува збор за способноста и очигледната желба постојано да продолжи да се бори – и на суд и во јавноста – и покрај толку многу удари.

„Тој не се плаши од јавното мислење, не се плаши да влече големи потези“, вели Лунд.

Таа додава дека таквото игнорирање на ризикот е „вредна особина кај претприемачите“, но потсетува дека судницата не е сала за состаноци.

Лунд истакнува дека дури ни озлогласени агресивни корпоративни играчи како Карл Ајкан, познат „корпоративен напаѓач“ кој послужил како инспирација за ликот Гордон Геко во филмот „Wall Street“, немале толкава дрскост како Маск.

„Не знам дали и кога тоа ќе му се удри од глава“, рече Лунд.

Единствената јавна личност со која може да го спореди е претседателот Доналд Трамп, исто така познат по импулсивни јавни настапи и поведување правни постапки против оние што ги смета за непријатели.

„Маск е единствена личност, но негативните работи едноставно не се лепат за него“, заклучува таа.