„Corolla Cross Weekend Coast“ концептот носи луксузен детал инспириран од „Rolls-Royce Cullinan“.
„Toyota Corolla Cross“ можеби е во сенка на популарниот модел „RAV4“, но и понатаму претставува еден од поважните SUV модели на јапонскиот производител.
Сега доби интересна концепт верзија под името „Weekend Coast“, која ја осмисли јапонскиот добавувач на автомобилски ентериери „Hayashi Telempu“.
Целта на концептот е „Corolla Cross“ да стане идеално возило за викенд патувања, престој во природа и сопственици на домашни миленици.
Најголемата атракција се наоѓа во багажникот, каде се вградени извлекувачки седишта и потпирач за нозе, решение инспирирано од луксузниот пакет „Viewing Suite“ од „Rolls-Royce Cullinan“.
Компанијата „Hayashi Telempu“ е позната по производство на ентериерни компоненти, подни облоги и звучна изолација за бројни автомобилски производители, вклучувајќи ги „Toyota“, „Honda“, „Nissan“ и „Subaru“.
Внатрешноста на концептот доби нова комбинација од сини и бели тонови, детали инспирирани од морскиот брег, амбиентално осветлување и панорамски покрив. Надворешноста го следи истиот стил благодарение на двобојната комбинација од светлосина и бела боја.
Под каросеријата нема промени, па концептот користи стандарден хибриден погон од јапонската верзија на моделот „Corolla Cross“.
„Weekend Coast“ ќе биде претставен на саемот „Field Style Tokyo Show“ во Јапонија, каде компанијата ќе собира реакции од семејства и љубители на активности на отворено.
Некои од прикажаните решенија подоцна би можеле да се појават и како дополнителна опрема за сериските автомобили.
