Кина наскоро би можела да развие своја верзија на контроверзниот AI модел „Mythos“, предупреди германската челничка за сајбер безбедност Клаудија Платнер. Според нејзините зборови, кинеските технолошки компании како „Alibaba“ во последните месеци престанале јавно да објавуваат надградби на своите AI модели, што би можело да значи дека продолжуваат со развој на напредни системи зад затворени врати.
Претседателката на германската Сојузна канцеларија за информатичка безбедност („BSI“) во средата на затворен состанок ги информирала членовите на одборот за дигитални прашања на германскиот Бундестаг, пишува „Politico“. Тројца пратеници кои присуствувале на состанокот изјавиле дека Платнер предупредила на можен бран на сајбер закани од Кина базирани на вештачка интелигенција.
Американската компанија „Anthropic“ на почетокот на април го претстави својот модел „Mythos“, за кој тврди дека има исклучително напредни способности за пронаоѓање безбедносни ранливости и хакирање. Компанијата тогаш го ограничи пристапот до моделот на мал број избрани организации.
Платнер наводно предупредила дека кинеските компании можеби воопшто нема да нудат таков ограничен пристап за партнери, што би можело европските институции да ги остави „во мрак“ кога станува збор за вистинските можности на новите AI системи.
Во меѓувреме, и „OpenAI“ го претстави новиот модел „GPT-5.5-Cyber“ со слични способности, а безбедносните компании се обидуваат да ги приспособат своите одбранбени системи на новата генерација AI алатки способни за софистицирани сајбер напади.
Европските институции истовремено предупредуваат дека Европската Унија заостанува во оваа трка. Кина со години се смета за еден од најголемите извори на софистицирани сајбер закани кон Европа, а европските агенции сè уште немаат добиено пристап до „Mythos“ за тестирање.
Платнер им изјавила на пратениците дека нејзината канцеларија засега мора да се потпира на информации од партнери од Обединетото Кралство и САД, кои добиле пристап до моделот. Тоа предизвикува фрустрации кај европските функционери, бидејќи Унијата би можела да остане неподготвена за очекуваниот бран на AI-поддржани сајбер напади.
„Европа не е на масата“, предупредил холандскиот либерален пратеник Барт Гротхаус. Тој, заедно со уште 29 европратеници, на почетокот на мај испратил писмо до Европската комисија барајќи изработка на европски план за заштита од новите AI закани.
Слични предупредувања во последните недели доаѓаат и од европските влади. Француската министерка за вештачка интелигенција и дигитални прашања, Ан Ле Енанф, порача дека Европа мора да го забрза развојот на сопствените AI безбедносни системи за да не стане зависна од американските компании.
Европските функционери во меѓувреме го зголемуваат притисокот врз „Anthropic“, барајќи американската компанија да овозможи соработка со европските институции и безбедносни агенции пред новите AI технологии дополнително да го променат глобалниот пејзаж на сајбер безбедноста.
