На едно од најстудените и најсурови места на планетата постои сцена која изгледа како оние од филмовите: од глечерот на Антарктикот излегува темноцрвен тек поради кој овој феномен го добил името „крвав водопад“. Иако сцената делува речиси нереално, објаснувањето е целосно научно.
Крвавиот водопад се наоѓа на глечерот Тејлор во подрачјето на антарктичките Суви долини.
Научниците утврдиле дека црвената боја не потекнува од алги ниту некое „мистериозно“ загадување туку од исклучително солената вода богата со железо која избива под глечерот.
Кога таа течност доаѓа во контакт со воздухот, железото оксидира и прима црвенкаста боја, слично како што ‘рѓата го обојува металот.
Она што овој феномен го прави уште пофасцинантен е фактот што водата потекнува од древниот подледен систем на солена вода којшто долго бил заробен под мразот.
Научниците забележале дека станува збор за хиперсолена вода богата со железо која низ пукнатините излегува на површината на глечерот.
Дополнително внимание на научната јавност крвавиот водопад привлекол и поради животот во екстремните услови.
НАСА претходно навела дека истражувачите во таа средина нашле микроби кои опстојуваат без светлина и кислород, користејќи хемиски процеси поврзани со сулфур и железо.
Токму поради ова место научниците набљудуваат и можен модел за разбирање на животот во екстремни услови, па дури и надвор од Земјата.
Иако изгледа застрашувачки, крвавиот водопад е еден од најинтересните природни феномени на светот – потсетник дека и во мразот, тишината и темнината на Антарктикот и натаму кријат сцени кои делуваат целосно нереално.
Денес
