Целосно обновен за новата генерација

За разлика од претходните изданија, „Resynced“ не е ремастер, туку игра изградена од нула на најновата верзија на "Anvil engine", истиот што ги придвижува „Assassin’s Creed Mirage“ и претстојниот „Assassin’s Creed Shadows“. Развојот го води „Ubisoft Singapore“.

Ова носи значајни визуелни подобрувања, од "ray-tracing" осветлување и "Dolby Atmos" звук, до напреден динамички систем на време, со бури и бранови што реално влијаат на пловидбата низ Карибите.

Редизајнирана гејмплеј механика

Најголемите промени се во самото играње. Борбата е преработена да биде побрза и пофлуидна, со акцент на парирање што отвора можности за стратешки елиминации.

"Parkour" системот е проширен со нови движења, а конечно е додадена и можност за клекнување насекаде, што го олеснува прикрадувањето.

За ветераните на оригиналот, една од најважните промени е целосното редизајнирање на мисиите за следење – повеќе нема автоматски неуспех ако ве забележи непријателот, туку мисијата продолжува динамично, преку борба или потера.

И покрај новитетите, развивачите нагласуваат дека играта останува верна на духот на оригиналот.

„„Assassin’s Creed: Black Flag Resynced“ ни е исклучително важен. Затоа одвоивме време да го обновиме со вниманието што го заслужува. Ова останува соло авантура водена од приказна и ликови. Не е RPG“, изјави директорот на играта Ричард Најт.

Повеќе приказна, нови ликови и морнарски песни

Приказната е проширена со нова содржина што ја продлабочува авантурата на Едвард. Додадени се мисии што го истражуваат односот меѓу Црнобрадиот и Стед Боне, а оригиналниот сценарист Дарби МекДевит напишал и нова сцена меѓу Едвард и неговата сопруга Каролин.

Актерот Мет Рајан повторно го позајмува гласот на главниот лик.

Екипажот на бродот "Jackdaw" ќе биде проширен со три нови офицери, секој со сопствени мисии, а играчите ќе можат да имаат и миленик – мачка или мајмун. Се враќаат и популарните морнарски песни (sea shanties), со неколку нови додадени.

Без мултиплеер и „Freedom Cry“

Сепак, римејкот нема да ги вклучи сите елементи од оригиналот. Потврдено е дека „Resynced“ нема да има мултиплеер режим, ниту популарниот DLC „Freedom Cry“, кој ја следи приказната на Адевале.

Одлуката е донесена за тимот целосно да се фокусира на најдоброто можно соло искуство и обновата на сагата на Кенвеј.