Важно е да се нагласи дека ниту еден од споменатите играчи не е под истрага ниту се сомничи за кривично дело.

Нивните имиња се наоѓаат на список од повеќе десетици „клучни зборови“ кои обвинителството во Милано, под водство на Марчело Виола, ги навело во налогот за претрес и заплена. Налогот е извршен пред два дена, кога четири лица беа уапсени и ставени во куќен притвор поради сомнение за искористување и поттикнување на проституција, при што услугите наводно биле наменети за играчи од бројни клубови, вклучувајќи ги Милан, Интер и Јувентус, пишува „ANSA“.

Клучни зборови за анализа на уреди

Споменатите клучни зборови ќе им служат на истражителите од Единицата за економски и финансиски криминал на италијанската финансиска полиција (Gdf) при анализата на телефони и други електронски уреди на двајца наводни организатори на незаконските активности и нивните соработници.

Целта е да се пронајдат докази што би ги поткрепиле обвиненијата. Списокот со презимињата на фудбалерите прв го објави весникот „Il Giornale“, а агенцијата „ANSA“ потврди дека на една страница од обвинителскиот налог се наоѓаат повеќе од шеесет имиња.

Утврдување на размерите на наводните активности

Обвинителството во продолжение на истрагата ќе ги испита девојките во својство на сведоци и ќе спроведе дополнителни технички дејствија, како што е анализа на мобилни уреди, со цел да се утврди вистинскиот обем на наводниот синџир на проституција.

Имено, истражителите ја проверуваат можноста дека некои фудбалери учествувале само на забави во миланските ноќни клубови кои ги организирала компанијата „Ma.De Milano“, наводен параван за овие активности, но без користење на „дополнителната услуга“. Таа услуга вклучувала ноќевање во хотел и платен секс, а во некои прилики била придружена и со консумирање на азотен оксид, познат како „гас за смеење“.