Поврзаноста меѓу спиењето и здравјето на срцето

Спиењето може да се гледа како процес на регенерација на организмот, кој помага во отстранување на токсините и намалување на стресот и воспаленијата, поврзани со многу хронични болести.

„Квалитетниот сон, особено доволното количество на длабок и REM сон, е клучен за целокупното кардиоваскуларно здравје“, вели д-р Ренато А. Аполито, кардиолог и медицински директор на лабораторија за срцева катетеризација во Медицинскиот центар на Универзитетот Џерси Шор.

„Всушност, една од најсилните врски меѓу спиењето и кардиоваскуларното здравје е апнејата при спиење.“

Дали спиењето на левата страна е штетно?

Иако можеби сте слушнале дека спиењето на левата страна создава поголем притисок врз срцето, особено кај лица со срцева слабост, д-р Аполито вели дека нема истражувања кои го потврдуваат тоа.

„Општо, немаме цврсти докази дека некоја положба за спиење е значително подобра од друга кога станува збор за здравјето на срцето“, објаснува тој.

„Не би рекол дека постои една универзално ’најдобра‘ положба. Тоа во голема мера зависи од личноста, нејзините ортопедски потреби, удобноста и градбата на телото. Луѓето и онака се движат во текот на ноќта, па не ја поминуваат целата ноќ во иста положба.“

Телото најчесто добро се приспособува, додава тој. „Поважно е дали положбата влијае на дишењето, на пример дали доведува до опструкција на дишните патишта што може да предизвика апнеја, или создава мускулно-скелетен напор, како што е спиењето на стомак, што не го препорачуваме.“

Поголем ризик: апнеја при спиење

Сега кога можете да бидете помирни во врска со положбата за спиење, време е да се фокусирате на поголем и често недијагностициран проблем – апнејата при спиење.

Таа „може да придонесе за висок крвен притисок и да го зголеми ризикот од атријална фибрилација“, вели д-р Аполито. „Почеста е кај лица со подебел врат или одредена телесна градба, иако може да се јави и кај луѓе со нормална тежина. Најважниот чекор е поставување точна дијагноза.“

Постојат неколку клучни симптоми на опструктивна апнеја при спиење на кои треба да се внимава. Тоа се дневен замор, дури и по доволен сон, и ненадејна поспаност при вообичаени активности, како работа на компјутер. Други симптоми вклучуваат утрински главоболки, слаб квалитет на сон со чести будења, како и гласно ’рчење или прекини во дишењето што може да ги забележи партнерот.

Ако се сомневате на апнеја, обратете се кај лекар. Тестирањето е едноставно, а третманот, често со помош на CPAP уред или други терапии, може значително да го подобри квалитетот на сонот и здравјето на срцето.

Заклучок: најдобрата положба за спиење

„Положбата за спиење не е главна грижа за здравјето на срцето“, истакнува д-р Аполито. „Апнејата при спиење и вкупниот квалитет на сонот се многу поважни.“

Пораката е едноставна: спијте во положба која ви е најудобна, дури и ако тоа е левата страна. Приоритет треба да бидат седум до девет часа квалитетен сон и следење на симптомите на апнеја. Овие едноставни чекори ќе направат многу повеќе за здравјето на срцето отколку било која конкретна положба за спиење.