Познати по неверојатната хемија во улогите на Хурем и Сулејман, турските ѕвезди веќе предизвикуваат глобална возбуда за новото остварување – првенствено поради заедничкото појавување во него. Фотографијата дополнително ги „полуде“ фановите.

На фотографијата што брзо се прошири на интернет се гледа дека легендарните султан Сулејман и Хурем повторно се сретнале, и тоа на читање на сценариото за филмот „Imroz’da Bahar“ („Пролет на Имроз“). Ова е нивен прв заеднички проект по огромниот успех на серијата „Сулејман Величествениот“, а веќе важи за еден од најочекуваните филмски наслови.

Како што се наведува во описот што ја придружува фотографијата, Халит Ергенч и Мерјем Узерли се обединиле на сетот, каде што го започнале работењето на филмот, а нивната средба по речиси 15 години предизвика силни емоции кај фановите ширум светот. Токму тој момент на повторно обединување дополнително го зголеми интересот за проектот, кој многумина веќе го нарекуваат потенцијален голем хит.

Тие останаа запаметени како еден од најхаризматичните актерски парови, благодарение на исклучителната хемија што ја постигнаа во серијата „Сулејман Величествениот“. Нивниот однос на екранот беше толку убедлив што значително придонесе за глобалната популарност на оваа историска драма, која и денес се смета за една од најуспешните турски серии.

Токму поради тоа, нивното повторно обединување има посебна тежина – и за публиката и за продукцијата, која очигледно смета на енергијата и препознатливата динамика на овој тандем.

Судбина и втора шанса

Новиот филм „Пролет на Имроз“ го режира Озџан Алпер, наградуван автор познат по остварувања како „Есен“, „Мрачна ноќ“, „Рана зима“ и „Фестивал на вљубените“. Неговиот авторски пристап и емотивни приказни дополнително ги зголемуваат очекувањата од овој проект.

Дејството на филмот е сместено на островот Имроз, денес познат како Гокчеада, најголемиот турски остров во Егејското Море. Станува збор за приказна за судбината, вторите шанси и љубовта што повторно го наоѓа својот пат. Филмот следи две лица чии патишта неочекувано се вкрстуваат, отворајќи го прашањето дали е можно да се започне нов живот и повторно да се пронајде љубовта.

Снимањето наскоро треба да започне, додека деталите за дистрибуцијата сè уште не се официјално потврдени.

„Сулејман“ не го завршија во тандем

Интересно е што ова е првпат Халит Ергенч и Мерјем Узерли повторно да работат заедно по серијата што ги прослави и која одбележа една телевизиска ера. Да потсетиме, Мерјем Узерли за време на емитувањето го напушти проектот поради исцрпеност и синдром на согорување, по што улогата на Хурем ја презеде Вахиде Перчин. Сепак, токму нејзината интерпретација остана една од највпечатливите во современата телевизиска продукција.

Повторното обединување на овој актерски пар веќе привлекува големо внимание, а многумина се прашуваат дали нивната препознатлива хемија повторно ќе ја освои публиката – овој пат на големото платно.

Едно е сигурно – интересот е огромен, а очекувањата уште поголеми.