Меѓу 1 јануари и 31 март 2026 година, вкупниот број на „Биткоин“ адреси кои поседуваат најмалку еден милион долари паднал од 148.084 на 127.494, што претставува намалување од 20.590 адреси, односно пад од 13,90 проценти во текот на кварталот, покажува анализата на компанијата „Finbold“.
Ова намалување се совпадна со значителен пад на цената на „Биткоин“, која од околу 88.700 долари на почетокот на годината падна на 68.200 долари до крајот на првиот квартал, што е пад од 23 проценти. Податоците укажуваат дека намалувањето на бројот на „милионерски“ паричници главно е последица на падот на цената, а не на масовна продажба.
Најголем пад кај износите меѓу еден и 10 милиони долари
Во рамките на вкупниот број, најголем пад е забележан кај адресите кои држат меѓу еден и 10 милиони долари. Овој сегмент се намалил од 131.716 на 113.233, односно за 18.483 адреси, што покажува дека сопствениците на средни износи биле несразмерно погодени од корекцијата на цената.
На повисоко ниво, бројот на адреси со 10 милиони долари или повеќе исто така опаднал – од 16.368 на 14.261, што е намалување од 2.107 адреси во истиот период. Иако се поотпорни од помалите категории, ни овие адреси не биле имуни на поширокиот пад на пазарот.
Во споредба со истиот период минатата година, падот дополнително се продлабочил. Во првиот квартал од 2025 година, „Биткоин“ изгубил 13.942 „милионерски“ адреси, што значи дека падот во првиот квартал од 2026 година е поголем за 6.648 адреси, односно дури 47,7 проценти подлабок на годишно ниво.
Ова укажува на влошување на пазарните услови, при што ценовната волатилност има сè поголемо влијание врз распределбата на богатството на мрежата. И покрај падот на бројот на милионерски адреси, податоците не укажуваат нужно на масовно повлекување на капитал.
Напротив, станува збор за промена во класификацијата поради падот на цените, каде што пониските вредности ги туркаат паричниците под клучните прагови на богатство без значителни промени во реалната сопственост.
Наодите доаѓаат во време на континуирано учество на институционални инвеститори на пазарот на „Биткоин“. Како што претходно беше објавено, големи управувачи со средства како корпорацијата „BlackRock“ ги зголемиле своите позиции во „Биткоин“ во текот на првиот квартал од 2026 година, и покрај падот на цените.
Оваа разлика сугерира дека помалите и средни инвеститори биле поизложени на падот на вредноста, додека големите играчи продолжиле да акумулираат „Биткоин“ како дел од долгорочни стратегии.
Волатилноста како голем проблем
Важно е да се напомене дека едно лице може да контролира повеќе „Биткоин“ адреси, што значи дека бројот на паричници не одговара директно на бројот на поединечни инвеститори.
Сепак, овој тренд останува корисен показател за промените во распределбата на богатството на мрежата. Податоците укажуваат на поширока промена во структурата на пазарот на „Биткоин“, каде што ценовната волатилност сè повеќе го погодува средниот слој инвеститори, додека поголемите актери ги задржуваат или дури ги зголемуваат своите позиции.
