Видеото предизвика лавина коментари на интернет, а многумина сметаат дека вработениот уништил посебен момент.

Вирална снимка од прекинато запросување

На снимката објавена на социјалната мрежа X се гледа маж како клечи пред својата партнерка. Во моментот кога го отворил кутивчето со прстенот, дотрчал вработен, му го зел прстенот од рака и го прекинал запросувањето.

Парот, како што изгледа, се наоѓал на издигната платформа на која не е дозволено задржување. Вработениот им посочил да се симнат на пониско ниво, каде што можат да продолжат. Додека посетителите негодувале и му довикувале, тој само одмавнувал со главата кон толпата.

Поделени реакции на интернет

Корисникот кој го објавил видеото напишал: „Ова никогаш не е толку сериозна работа, типот е чуден, жал ми е“.

Многумина во коментарите се согласија. „Што по ѓаволите, брате, ќе добиеш ли отказ ако ги оставиш да стојат уште 20 секунди за да завршат? Му го уништи моментот на човекот“, гласи еден коментар. Друг додал: „Инстинктивно би го оттурнал човекот што ми го грабнува прстенот од рака. Баш ми е гајле каде се наоѓаме, не допирај нешто што не си го платил“.

Од друга страна, дел од корисниците застанаа во одбрана на вработениот, тврдејќи дека попуштањето би создало преседан и би ги поттикнало другите да ги кршат правилата. „Не е чудно што си ја работи работата. Чудно е што не разбирате дека тоа му е работа и дека гостите очигледно ги игнорирале знаците и се качиле на сцената. Запросувањето е ваш личен момент, зошто не го направите било каде на друго место во паркот, зошто баш на сцена?“, напиша еден корисник. Друг се надоврза: „Ако не сакате некој да ви зема лични работи за да ве тргне од забранети области, тогаш не се наоѓајте на забранети места“.

Дали се дозволени запросувања во „Disney World“?

Запросувањата во „Disney World“ се дозволени, но постојат одредени правила. Во една дискусија на „Reddit“, искусни посетители објаснија што е дозволено, а што не. „Апсолутно е дозволено да се запросува во паркот“, напиша еден корисник, но додаде: „Управата ги заострува правилата за запросувања што ги попречуваат другите посетители, на пример за време на претстави, на сцени, пред поворки или на влезови и излези од атракции“. Исто така нагласи важно правило: „Ликовите на „Disney“ не смеат да бидат вклучени ниту да се фотографираат со вас додека таа не каже ‘да’“.