Џо Баур, кој се преселил во Германија со сопругата во 2016 година, ги споделил своите размислувања за тоа како животот во странство му го променил погледот на работа, мобилност и безбедност, во време кога сè повеќе Американци размислуваат за заминување од Соединетите Држави во потрага по подобар квалитет на живот, пишува „Newsweek“.

Желба за европски начин на живот

Баур ги сподели своите размислувања неодамна во објава на социјалната мрежа „Threads“, а подетално ги објаснил во видео на својот YouTube канал. Со сопругата прво се преселиле во Дизелдорф во 2016 година, а од крајот на 2019 година живеат во Берлин. Пред заминувањето од САД, живееле во Кливленд, а одредено време поминале и во Костарика.

Иако времето на нивното заминување се поклопило со американските избори во 2016 година, Баур истакнува дека одлуката не била политички мотивирана. „Мојот мотив не беше изречно политички, како што повеќето претпоставуваат бидејќи заминавме во 2016, непосредно пред Трамп“, рекол тој.

„Уште од факултет сакав да живеам некаде во Европа, дури и пред да го посетам континентот, бидејќи ми се чинеше прекрасно да си на место каде можеш да патуваш со воз и не ти е потребен автомобил.“

Тој додал дека неговиот интерес за живот во странство дополнително се зголемил по студиите во Индија и магистратурата во Костарика. Другите придобивки, како повеќе денови годишен одмор и помалку вооружено насилство, биле, како што вели, „само шлаг на тортата“.

Бирократијата како најголем предизвик

Иако животот во Германија во голема мера ги исполнил неговите очекувања, Баур признава дека бирократијата претставувала предизвик. „Не предвидов колку е сложена бирократијата ниту како навистина е да си мигрант, бидејќи едноставно не знаеш што те чека“, рекол тој.

„Секако, Германија не е совршена, ниедно место не е, но генерално заклучив дека ‚тревата овде и на друго место во Европа е позелена‘, барем кога станува збор за начин на живот кој ми одговара мене.“

Тој објаснил дека овој начин на живот вклучува независност од автомобил, широко достапен јавен превоз, градови прилагодени за пешаци и повеќе градски паркови и национални паркови до кои лесно може да се стигне со воз.

Се потсетил и на една од првите средби со германските имиграциски службеници, кога им било кажано дека нивниот венчален лист „не е доволно елегантен“, проблем што подоцна го решиле. „Не би рекол дека бирократијата беше изненадување, но дефинитивно беше предизвикувачка и стресна“, заклучил.

Различно сфаќање на слободата во САД и Европа

Баур вели дека голем дел од дискусијата за неговата објава се сведе на разликата помеѓу „слобода за“, како Американците често ја сфаќаат, и „слобода од“, за која почесто зборуваат Европејците.

„Многумина коментираа дека во САД имате ‚слобода за‘, а во Европа ‚слобода од‘, и мислам дека тоа прилично добро ја сумира целата работа“, рекол.

Американските слободи, како поседувањето оружје или можноста насекаде да се оди со автомобил, тој ги споредил со она што во Германија го доживеал како слобода од стрес и грижа дека здравствен проблем би можел да доведе до банкрот, како и од изолација и постојан притисок поврзан со работата.

„Поради многу посилните мрежи за социјална заштита, ослободен сум од оној чувството на корпоративна парализа, кога останувате на работа што ја мразите со лоши услови само затоа што ви треба здравствено осигурување. Тука можам да ги следам своите деловни интереси“, објаснил.

Сепак, додава: „Секој слободата ја доживува на свој начин. Некои можеби ќе го преферираат американскиот стил. И тоа е во ред.“

Американците во потрага по подобар живот

Приказната на Баур е дел од поширок тренд на Американци кои преиспитуваат животот во странство. Според извештај на „The Wall Street Journal“, во 2025 година повеќе луѓе се иселиле од САД отколку што се вселиле во нив, што претставува промена непрепознатлива уште од Големата депресија.

Истражување на „Harris Poll“ објавено минатата година покажало дека малку повеќе од половина Американци веруваат дека би можеле да имаат поквалитетен живот во странство, при што како клучен мотив ги наведуваат пониските трошоци за живот. Како најпосакувани дестинации за преселба се истакнаа Канада, Обединетото Кралство и Австралија.

За Баур, одлуката на крајот се свела на различно сфаќање на американскиот сон. „Како што сè повеќе луѓе патуваат и гледаат дека американскиот начин на живот не е единствено можно решение, многумина сфаќаат дека не се среќни со типичната животна патека во САД. Затоа заминуваат, во потрага по својот ‚американски сон‘ некаде на друго место“, заклучил тој.