Новиот паметен телефон го отфрла класичниот дигитален екран, а наместо него користи „E Ink“ технологија за да му даде свеж и впечатлив изглед.
„E Ink“ е технологија на екран што верно го имитира изгледот на вистинско мастило на хартија, а најчесто се користи кај е-читачи, паметни стикери и таблети. Оваа технологија е избрана со цел да се намали заморот од сина светлина, чие прекумерно изложување може да го наруши сонот и да ги замори очите.
Моделот „HiBreak Plus“, на кинеската компанија „Bigme“, има „E Ink“ екран во боја од 6,13 инчи и претставува 4G „Android“ телефон со целосна поддршка за „Google Play“ продавницата.
Уредот е дизајниран да биде попријатен за очите и природно читлив на директна сончева светлина, без потреба од максимално засилување на осветлувањето. Овозможува корисниците да проверуваат мапи, да прават белешки на отворено или да читаат на попладневно сонце.
Нема позадинско осветлување, туку површина слична на хартија која ја рефлектира амбиенталната светлина. Уредот нуди 36 нивоа на осветленост и автоматски ја калибрира осветленоста и температурата на бојата, преминувајќи од ладен, остар тон за утринска работа во топол килибарен сјај навечер.
Екранот може да се користи и за пишување или цртање со помош на опционално пенкало.
Уредот располага со 4 GB RAM меморија, GPS, сензор за отпечаток од прст и батерија за која производителите тврдат дека лесно ќе надживее повеќето конвенционални паметни телефони, благодарение на енергетски ефикасниот „E Ink“ екран. Тежи само 193 грама.
Телефонот веќе е пуштен во продажба преку веб-страницата на компанијата со достава ширум светот, по претпродажна цена од 236 евра.
