Речиси секој возач барем еднаш се нашол во ситуација да вози на „резерва“, верувајќи дека ќе „издржи уште малку“. Но токму во тие моменти многумина прават дополнителни грешки кои можат да ја зголемат потрошувачката и да го скратат патот до целосно празнење на резервоарот. Со само неколку едноставни трикови може да се извлече максимум од последните капки гориво и безбедно да се стигне до следната бензинска станица.
Возачите понекогаш премногу се потпираат на „резервата“, било поради брзање или одложување на точењето гориво, особено откако цените растат. Иако автомобилите обично можат да поминат одредено растојание, начинот на возење во тие моменти станува клучен. Малите одлуки зад воланот можат да направат голема разлика меѓу стигнување до бензинска станица или запирање на сред пат.
Кога горивото се намалува, секој дополнителен потрошувач игра улога. Исклучувањето на клима-уредот го намалува оптоварувањето на моторот и може да помогне во заштеда на гориво. Од друга страна, често погрешно се верува дека исклучувањето на радиото или аудио-системот има ист ефект, но тоа во пракса речиси и да не прави разлика.
Внимавајте како возите
Во моменти кога сте на „резерва“, инстинктот може да ве наведе да забрзате за побрзо да стигнете до дестинацијата. Но токму тоа е голема грешка, бидејќи таквото возење ја зголемува потрошувачката. Притискањето на педалата за гас до крај го тера моторот да троши повеќе гориво отколку што е потребно, со што дополнително се намалува дометот на возилото. Возењето со голема брзина исто така не е сојузник кога се обидувате да заштедите гориво.
Веќе над приближно 80 километри на час, ефикасноста значително опаѓа, па попаметно е да се вози умерено и стабилно за да се извлече што повеќе километри од преостанатото гориво. Покрај забрзувањето, проблем претставува и наглото кочење. Таквиот стил на возење ја нарушува рамнотежата на потрошувачката и го зголемува губењето енергија. Уште понеповолно е возењето со чести запирања и повторни тргнувања, бидејќи моторот тогаш постојано работи под оптоварување.
Затоа најпаметно е да се вози што е можно „помирно“, без нагли промени на брзината, со однапред планирање на движењето и рутата кога тоа е можно. Кога ќе се запали ламбичката за гориво, најважно е да се задржи смирен стил на возење – рамномерно движење, умерена брзина и избегнување нагли реакции ќе овозможат автомобилот да помине максимално растојание со преостанатото гориво.
Значи, кога следниот пат ќе се најдете во ваква незгодна ситуација, запомнете дека не е само важно колку гориво ви останало, туку и како ги возите тие последни километри.
