[ФОТО/ВИДЕО] Во оваа земја во недела запира сѐ: Забрането им е да работат, па дури и да одат на плажа, поради тоа можат да следат и казни

Кралството Тонга е островска држава која се наоѓа во јужниот дел на Тихиот Океан, источно од Фиџи и северно од Нов Зеланд. Се состои од архипелаг со повеќе од 170 острови, од кои околу 36 се населени. Главен град и административен центар на земјата е Нукуалофа, кој се наоѓа на најголемиот остров Тонгатапу.

Тонга е единствен по тоа што е една од ретките земји во Пацификот која никогаш не била формално колонизирана, иако во минатото била под британски протекторат. Денес функционира како уставна монархија, каде што кралот има значајна политичка улога, но ја дели власта со избраниот парламент.

Покрај сето тоа, позната е по строгото почитување на христијанската традиција, особено неделата како ден за одмор и богослужба. Оваа практика е длабоко вкоренета во законодавството и секојдневниот живот на населението.

Во недела во Тонга, продавниците, рестораните и повеќето бизниси се затворени, риболовот, рекреативното пловење и спортските активности се забранети, а јавниот превоз е речиси непостоечки. Дури и одредени видови работа и забава се законски ограничени.

Американскиот јутјубер и авантурист Дру Бински ја посетил земјата во 2022 година и снимил каков е животот таму во недела.

„Работата е всушност нелегална и може да се казни со голема парична казна или затвор“, вели тој.

Туристите претежно нема да можат да планираат класични екскурзии, шопинг или излегувања на тој ден. Овие правила потекнуваат од законите што ја штитат светоста на неделата, кои беа донесени под силно влијание на христијанските мисионери уште во 19 век. Дури и денес, поголемиот дел од населението редовно присуствува на црковни служби, а државата активно го зачувува овој обичај.

Неодамна, поради развојот на туризмот, направени биле одредени компромиси. Некои хотели и туристички одморалишта можат да понудат ограничени услуги на гостите, но надвор од овие рамки - земјата практично „стои“.