Астронаутот на американската вселенска агенција НАСА, Дон Петит, објавил фотографија од необичен виолетов предмет од Меѓународната вселенска станица (ISS), кој поради својот необичен изглед предизвика големо внимание и бројни реакции на социјалните мрежи.
На фотографијата се гледа предмет со јајцевидна форма и израстоци налик на пипала, поради што многу корисници на социјалните мрежи на прв поглед помислиле дека станува збор за нешто вонземско. Меѓутоа, објаснувањето е многу поедноставно — станува збор за компир одгледан во вселената.
Според достапните информации, Петит го одгледал компирот за време на мисијата на „ISS“, во рамки на сопствената „вселенска градина“, со која се занимавал во слободно време.
Компирот, наречен „Спудник-1“, бил прицврстен со велкро-лента во импровизирана мини-стаклена градина со вештачко осветлување.
Поради условите на микрогравитација, компирот развил необична форма — корените растат во сите правци, а развојот на растението е побавен отколку на Земјата. Токму тие фактори придонеле за неговиот необичен, речиси „вонземски“ изглед.
„Спудник-1, компир во орбитата на Меѓународната вселенска станица“, напишал Петит.
Притоа нагласил: „Ова е ран виолетов компир со малку велкро на куката за прицврстување во мојот импровизиран терариум со светло за одгледување“.
Тој напоменал колку компирот е „ефикасен“ врз основа на јадливите хранливи материи во однос на вкупната растителна маса, вклучително и корените.
Развојот на технологија за одгледување храна во вселената, особено на Марс и на Месечината, стана значаен фокус за бројни вселенски агенции во последните неколку години.
