На денешен ден, 25 март 1926 година, е роден легендарниот унгарски боксер Ласло Пап.
Ласло Пап е еден од ретките непоразени боксери во професионалната кариера.
Ако ги прашате Унгарците кои се најдобрите спортисти во историјата на нивната земја, нема дилема дека членовите на славната фудбалска „лесна коњица“ ќе се најдат на првото место. Сепак, нивната популарност во тешкиот повоен период на комунизмот беше загрозена од еден боксер – Ласло Пап.
Исклучително популарниот боксер беше ценет и надвор од својата земја, па многумина го сметаат за еден од најголемите „амбасадори“ на овој спорт во историјата.
Го доби прекарот „поштар“ многу пред славниот кошаркар Карл Мелоун, бидејќи во слободно време работеше како поштар во Будимпешта, а во рингот секогаш успеваше да „испорача“ удари право во лицето на противникот.
Ласло е роден во Будимпешта на 25 март 1926 година. Во време на голема сиромаштија се обидел да им помогне на родителите така што почнал да се занимава со бокс. Многу нешта морале да се поклопат за да замине на Олимписките игри во Лондон 1948 година. А таму речиси потхранетиот Унгарец во средна категорија ги победуваше сите редум. Во финалето го совлада домашниот натпреварувач Џон Рајт и го освои златниот медал со убедливи победи – со нокаут или со резултат 3-0. Тоа беше вовед во нешто што никој пред него не го постигнал – трипати по ред да стане олимписки шампион.
Четири години подоцна освои злато во Хелсинки, но во полусредна категорија. И таму ги доби сите мечеви со нокаут или со 3-0.
Олимписките игри во Мелбурн се разликуваа по еден детал од претходните две. Во финалето го совлада Американецот Хозе Торес со 2-1. Тоа беше прв и единствен пат да изгуби рунда на Олимписките игри.
Откако освои сè во аматерскиот бокс, во 1957 година премина во професионалци. Но, бидејќи во комунистичка Унгарија професионалниот спорт беше забранет, Пап патуваше во Виена, каде тренираше и се бореше. Победуваше без престан и во 1964 година стигна до борба за светска титула. И токму таму заврши неговата кариера. Суровата животна реалност го натера да избира меѓу унгарското државјанство и боксот, бидејќи унгарските власти не сакаа да му издадат виза за САД. Одбра да остане Унгарец, иако веќе имаше потпишан договор за борба за светската титула.
Во аматерската кариера имаше 301 победа, 12 нерешени мечеви и шест порази. Дури 55 пати ги нокаутираше ривалите уште во првата рунда.
Ласло Пап го напушти професионалниот ринг непоразен, што е реткост во боксот. Оствари 27 победи и две нерешени борби, од кои 15 со нокаут. Покрај тоа, воведе нови методи на тренинг и нови стилови на борба. Толку беше пред своето време и пред противниците што понекогаш изгледаше речиси комично. Сепак, во ниту еден момент достоинствениот Ласло Пап не ги понижуваше оние што губеа.
Пап во 1989 година беше прогласен за почесен светски шампион. Со ореолот на „најдобар боксер во средна категорија во историјата“, беше примен во Куќата на славните на боксот во 1991 година.
Ласло Пап почина во Будимпешта на 16 октомври 2003 година, а причините никогаш не беа објавени. По него денес во Будимпешта е именувана втората по големина сала во Унгарија, со капацитет од 12.500 места, каде главно се одржуваат концерти, боксерски мечеви и натпревари на националната хокеарска репрезентација.
