На почетокот на 2000-тите, Хајгл беше убедливо најбараната млада актерка во светот. Нејзината улога на докторката Изи Стивенс во незаборавната „Вовед во анатомија“ ја лансирала до ненасетни височини, а набрзо следувале и главни улоги во тогаш најголемите романтични комедии. Ѝ предвидувале статус на новата Џулија Робертс, но потоа следувал ненадеен и неверојатно стрмоглав пад.

Од холивудска миленичка до непожелна личност

Од холивудска миленичка, Кетрин Хајгл преку ноќ се претворила во апсолутно „непожелна“ личност со која никој во индустријата повеќе не сакал да работи. Како точно се случило тоа?

Нејзиниот пад, се согласуваат инсајдерите, започнал во 2008 година по големиот кино-хит „Knocked Up“, во кој глумела со Сет Роген. Иако токму тој филм ја претворил во кралица на романтичните комедии, Кетрин во интервју за „Vanity Fair“ изјавила дека филмот е „малку сексистички“ и дека „ги прикажува жените како напорни и без смисла за хумор, додека мажите се симпатични и забавни“. Оваа нејзина изјава сериозно го налутила режисерот Џад Апатоу, но и нејзините колеги, со што првпат ја добила етикетата на личност „која ја гризе раката која ја храни“.

Но, вистинскиот и конечен крах на нејзината кариера се случил една година подоцна. Откако ја освоила престижната награда Еми за својата изведба во „Вовед во анатомија“, Кетрин апсолутно сите ги шокирала кога јавно го повлекла своето име од номинациите за оваа престижна награда.

Тешка, арогантна и неблагодарна личност

Нејзиното објаснување звучело, благо кажано, арогантно. „Не сметав дека оваа сезона добив доволно квалитетен материјал од страна на сценаристите за да ја оправдам номинацијата за Еми. За да не заземам место на актерка која добила добар материјал, го повлекувам своето име“, порачала јавно.

Нејзините зборови целосно ја разбесниле славната креаторка на серијата, Шонда Рајмс. Со неа се согласиле и бројни други влијателни продуценти, па актерката набргу добила епитет на исклучително „тешка, арогантна и неблагодарна“ личност. Набрзо потоа, нејзината улога во серијата била укината.

Гласините за нејзиниот „невозможен“ карактер брзо почнале да се шират низ холивудските кулоари како пожар. Извори од снимањата тврделе дека актерката, заедно со својата исто толку напорна мајка и менаџерка Ненси, редовно ги отежнувала снимањата со постојани поплаки за гардеробата, преработки на сценариото и барања за посебен третман.

Вратите и натаму затворени

Во годините што следувале, нејзините филмски проекти бележеле прилично лоши резултати на кино-благајните, а вратите на големите студија полека ѝ се затворале. Нејзиното име станало синоним за таканаречената „кенсл“ (cancel) култура во Холивуд, многу пред тој поим воопшто да постои.

Дури години подоцна, во интервју со Хауард Стерн во 2016 година, Кетрин признала дека одела на терапија поради страшниот стрес и анксиозност што ги чувствувала за време на јавниот линч. Како што признала поради сопствените зборови, научила исклучително болна и скапа лекција.

„Бев премлада и премногу се трудев да бидам целосно искрена, а не сфаќав дека со тоа всушност ги навредувам луѓето со кои работам. Требаше едноставно да молчам“, признала таа во едно од подоцнежните медиумски појавувања.

Иако во последните години полека се обидува да се врати на сцената преку помали телевизиски проекти, како серијата „Улицата на светулките“ (Firefly Lane), вратите на големиот Холивуд за некогаш најперспективната млада актерка очигледно и натаму остануваат цврсто затворени.