Компанијата „WCM Europe“ е основана по Втората светска војна во англиската покраина Есекс, а сега е уште една жртва на кризата во автомобилската индустрија.
„WCM Europe“ е специјализирана за производство на пластични делови и ладно обликување на челични компоненти. Меѓу другото, испорачувала висококвалитетни делови за ентериер за британски луксузни автомобили.
„WCM Europe“ работела со посебна техника која подразбира обликување на челик на собна температура под многу висок притисок.
Меѓу клиентите на компанијата се наоѓаат големи брендови како „McLaren“, „Bentley“, „Jaguar“ и „Land Rover“. Компанијата од самиот почеток имала производство и седиште во Базилдон, град оддалечен околу осумдесет километри од Лондон. За локалната заедница ова претставува голем удар, пренесува „RevijaHAK“.
Стечајниот управник сега го започна процесот на пронаоѓање потенцијален купувач кој би можел да го преземе бизнисот. Во меѓувреме, производството ќе продолжи, а вработените ќе останат на своите работни места, но времето полека истекува. Никој не може со сигурност да каже дали работниците ќе ги задржат своите работни места.
„Би сакале да изразиме искрена благодарност до клиентите, добавувачите и посветениот персонал на „WCM“ кои продолжуваат да работат со нас додека ги истражуваме можностите за потенцијална продажба на компанијата“, изјави стечајниот управник за весникот „The Sun“.
Доколку не се појави купувач, компанијата ќе биде затворена, а резервите ќе бидат продадени за да се исплатат доверителите.
