Клебо веќе освои три златни медали на ЗОИ во Милано и Кортина и чекори кон апсолутниот рекорд, а на навивачите ќе им стане уште помил кога ќе дознаат одредени детали од неговиот живот, кои се навистина интересни.

Дедото што создаде шампион

Клебо со скијачко трчање почнал да се занимава релативно доцна – на 16 години, кога се откажал од фудбалската кариера и започнал со посветени тренинзи на скии.

Тренирал секој ден, без оглед на условите, и сето тоа под надзор на својот дедо Коре Хесфлот, кој денес има 83 години.

Дедото е покрај Клебо од самиот почеток, му го подарил првиот пар скии кога имал две години и тоа е посебен спомен за денес блескавиот крос-кантри скијач.

„Беше совршен дедо. Од мојата десетта година почна да ме зема од тренинг. Без разлика дали тоа беше фудбал или скијачко трчање, доаѓаше по мене, ме возеше на тренинг и назад“, изјавил Клебо за „NBC“.

„Ми помагаше со различна опрема. Ако ми требаа нови ски чевли, ми ги купуваше за Божиќ. Никогаш не морав да го викам ‘тренер’ или нешто слично. Од самиот почеток секогаш беше дедо“, додал Клебо.

Избор меѓу фудбал и крос-кантри

Токму дедото одиграл главна улога во изборот на спортот со кој Клебо ќе се занимава. До својата 16 година тренирал и фудбал и скијачко трчање, а потоа морал да се одлучи за еден спорт.

Секако, за совет му се обратил на својот дедо и најдобар пријател.

„Навистина сакав да играм фудбал и во тој момент морав да одлучам дали ќе изберам крос-кантри или фудбал. Долго разговаравме за тоа и мислам дека двајцата се согласивме дека ми се допаѓа делот што, ако нешто тргне наопаку, можам да се обвинувам само себеси“, објаснил Клебо.

Тогаш Клебо одлучил дека сака да стане најдобар скијач-тркач во светот, што денес и е, со три олимписки злата во Италија.

На почетокот на Игрите во Италија освои злато во трката на 20 километри во скијатлон, оставајќи ја најблиската конкуренција повеќе од две секунди зад себе.

Потоа светот го обиколија неверојатни сцени од спринтот во слободен стил на 1.500 метри, во кои Клебо како некаков натчовек „лета“ по нагорнина со 17 километри на час, како да трча на атлетска патека.

По две доминантни злата, денес пристигна и третото. Клебо на 10 километри во слободен стил уште еднаш ја исчисти конкуренцијата. Второпласираниот Французин Матис Деслож побегна речиси пет секунди!

Покрај сите овие спортски успеси, Клебо е успешен Јутјубер, каде во соработка со неговиот брат, кој се занимава со монтажа на неговите видеа, и сестрата, која сè преведува на англиски, води канал на кој на навивачите им објаснува што сè мора да прави еден успешен олимписки натпреварувач.

Во неговата кариера се вклучени и татко му и мајка му. Таткото е менаџер, додека мајката се занимава со финансии. Таа е задолжена за финансискиот дел уште од кога Клебо имал 15 години.

Уште три чекори до апсолутниот рекорд

Клебо ќе настапи уште во машката штафета 4x7,5 километри, тимска трка во која Норвешка традиционално е еден од главните фаворити, потоа во тимскиот спринт, како и во маратонот на 50 километри со масовен старт.

Доколку освои златни медали и во овие дисциплини, Клебо ќе го надмине американскиот брзолизгач Ерик Хајден и ќе стане апсолутен рекордер на Зимските олимписки игри. Хајден на Игрите во 1980 година освои пет злата.