Симболиката на трите овали и приказната зад дизајнот од 1989 година.
Скриената симболика во амблемите на автомобилските брендови не е новост, па ни „Toyota“ не е исклучок. На прв поглед, трите препознатливи овали формирани во облик на буквата „T“ делуваат едноставно, но според официјалното објаснување на компанијата имаат подлабоко значење.
Од „Toyota“ наведуваат дека двата централни овали го симболизираат „обединувањето на срцата на купувачите и срцата на производите на Toyota“, додека просторот во рамките на надворешниот овал го претставува технолошкиот напредок на компанијата и неограничените можности во иднината. Иако некои сметаат дека станува збор за маркетиншка порака, „Toyota“ нагласува дека логото ја одразува посветеноста на сигурни и достапни автомобили, но и силниот технолошки развој на брендот.
На интернет често може да се сретне тврдењето дека од овалите на логото можат да се состават сите букви од името „Toyota“, но тоа не е официјално објаснување на компанијата.
Сепак, „Toyota“ потврдува дека двата внатрешни овали ја формираат буквата „T“, а воедно потсетуваат и на форма на волан.
Пред современиот знак, „Toyota“ користеше едноставен натпис со името на брендот, додека денешното лого беше претставено во 1989 година на моделот "Celsior" по повод 50-годишнината на компанијата.
Оттогаш стана еден од најпрепознатливите симболи во автомобилската индустрија.
