Во време на сомнеж и отуѓеност, мислата на Руми ја лекува душата и потсетува каде навистина треба да се бара смислата.
Постојат зборови што ја враќаат вербата во себе, а една мисла на Руми ја лекува душата и нè тера да нурнеме во океанот на среќата. Тешките и комплицирани времиња често ги тераат луѓето да се сомневаат во себе и во своите способности, да се чувствуваат како неважна капка во огромен океан. Токму затоа постои „цитатот на денот“, за да ве разбуди и поттикне.
Џелалудин Мохамед Руми, познат и како Мевлана, е персиски поет од 13 век и еден од најголемите суфиски мистици. На човештвото му остави безвременска духовна мудрост, а неговите зборови и денес инспирираат луѓе ширум светот, надминувајќи верски, културни и национални граници.
Еден негов познат цитат носи силна порака за идентитетот, внатрешната сила и поврзаноста со универзумот.
И сосема е доволен за утринска доза самодоверба:
„Ти не си капка во океанот. Ти си целиот океан во една капка.“
Руми нè потсетува дека човекот не е безначајна точка во бескрајот, туку суштество што во себе ја носи истата суштина како и целината на која ѝ припаѓа. Океанот ја симболизира божествената, универзална свест, додека капката го претставува човекот, мал по изглед, но бескраен по својата природа.
Пораката на Руми охрабрува самоприфаќање и будење на внатрешниот потенцијал. Кога ќе престанете да се доживувате себеси како ограничени и слаби, отворате простор за љубов, разбирање, креативност и лична трансформација.
Во време на сомнеж и отуѓеност, овој цитат нè потсетува дека смислата не треба да ја бараме надвор од себе – затоа што целиот океан веќе живее во нас.
