Документарецот, во кој „Амазон“ вложил 40 милиони долари, ја следи Меланија Трамп во текот на 2025 година додека се подготвувала за уште четири години во Белата куќа, нудејќи ѝ на публиката внимателно уреден поглед во животот на семејството.

На премиерата, одржана во четврток навечер во новоименуваниот центар „Trump Kennedy“, изостанала пошироката семејна поддршка. На настанот не присуствувал синот на Меланија, Барон, ниту пак останатите деца на Доналд Трамп.

Трамп за Меланија: Доаѓа од далечна, прекрасна земја

Ситуацијата на црвениот килим станала непријатна кога новинарите го прашале претседателот Трамп како се чувствува по повод филмот на неговата сопруга, за кој наводно биле платени 28 милиони долари. Тој изјавил дека е „горд“ на Меланија поради нејзиното потекло, но потоа не успеал да ја именува земјата од која потекнува.

Одговарајќи на прашањата, Трамп опширно зборувал за земјата од која потекнува неговата сопруга, но имал потешкотии да се сети каде точно е родена жената со која е во брак 20 години. „Таа доаѓа од една далечна, прекрасна земја. Чиста е, убава и безбедна. Нема проблеми какви што имаат другите. Доаѓа од многу безбедна, многу добра земја“, рекол претседателот.

Иако не можел да ја наведе нејзината татковина, Трамп ја пофалил нејзината интелигенција. „Таа е поинаква, зборува многу јазици, многу е паметна и разбира што се случува. И добро влијае врз мене“, додал Трамп.

Многумина кои ја следеле премиерата го забележале гафот на претседателот.

На социјалните мрежи се појавија коментари како: „Тој нема поим од која земја му е сопругата“ и „Заборавил од каде му е жената… зарем не?“

Која е Меланија Трамп?

Меланија (55) е родена во 1970 година во Словенија. Првата дама, која почнала да се занимава со манекенство на 16-годишна возраст, го искористила својот успех за во 1996 година да го напушти Балканот, откако ѝ бил понуден договор што ѝ овозможил имиграција во Соединетите Американски Држави.

Само две години подоцна го запознала тогашниот магнат за недвижности Доналд Трамп, а останатото е историја – или барем тема на најскапиот документарец некогаш снимен.