Кај повеќето луѓе кои често патуваат со авион, особено на долги релации со преседнувања, порано или подоцна се случува нивниот чекиран багаж да не пристигне со нив на крајната дестинација. Тоа се случува низ целиот свет, а куферите најчесто стигнуваат кај сопствениците по еден или два дена. Но што се случува со багажот кој никој не го бара или за кој авиокомпаниите не успеваат да го пронајдат сопственикот?
Да, навистина постојат патни торби што сопствениците никогаш не ги бараат и кои никогаш не стигнуваат до своето одредиште. Неподигнатите предмети, по истекот на законскиот рок (кој најчесто е 90 дена), се продаваат на аукција, а дел од нив подоцна завршуваат и во продавници за половна стока!
Куферите на аукциите најчесто се продаваат „на слепо“, односно се продава затворен куфер и купувачот не знае што има внатре додека не го плати и не го отвори. Но оваа пракса не ја следат сите аеродроми.
Постапувањето со неподигнатиот багаж во Европа е индивидуална одлука на секој поединечен аеродром и авиокомпанија, но во Соединетите Американски Држави приказната е поинаква — и прилично интересна!
Неподигнатиот багаж завршува во продавница која се простира на 4.500 квадратни метри
Авиокомпаниите во САД секоја година не успеваат да вратат стотици илјади куфери на патниците. Како што пишува „CNN“, авиокомпаниите обично три до четири месеци се обидуваат да ги поврзат изгубените куфери со нивните сопственици. Ако не успеат, ги продаваат на компанијата „Unclaimed Baggage“.
Продавницата „Unclaimed Baggage“ се наоѓа во сојузната држава Алабама и е огромна, простирајќи се на повеќе од 4.500 квадрати, а во неа работат стотици луѓе. Компанијата ја купува секоја торба таква каква што е, без да знае што има внатре. До моментот кога куферите завршуваат во продавницата, авиокомпаниите веќе им го исплатиле надоместокот на сопствениците и немаат никакви обврски кон нив, наведува „CNN“ во својата репортажа.
Бизнисот со откуп на неподигнат багаж е почнат во 70-тите години на минатиот век
Овој бизнис во 70-тите години на минатиот век го започнал Доил Овенс. Идејата ја добил кога во неговите раце завршила голема количина неподигнати торби од автобуска компанија. Со 300 долари во џеб и стар камион, тој тргнал во „лов на заборавени работи“, кои подоцна ги препродавал. Бизнисот растел, денес го води неговиот син, а продавницата е една од туристичките атракции на градот Скотсборо, каде што се наоѓа.
Неподигнатите предмети кои се продаваат може да се разгледаат и на нивната интернет страница
Трговијата „Unclaimed Baggage“ има и свој вебшоп, па работите што некој ги изгубил и не покажал интерес да ги најде се продаваат и преку интернет низ целиот свет. Интернет-страницата открива и необични предмети на кои наишле низ годините, од стара египетска маска, украси од слонова коска, до весници од 1934 година, лулиња на мирот, па дури и живи змии.
Продавницата ја посетуваат повеќе од милион луѓе годишно
Покрај продавницата, „Unclaimed Baggage“ има и мал музеј со тие чудни работи што ги пронашле. Таму има музички инструменти, колекционерски предмети, ексцентрични артефакти што сведочат дека туѓото некогаш било нечие богатство. Трговијата ги отвора куферите дури откако ќе ги откупи, ги сортира работите, ги чисти и го подготвува она што е соодветно за продажба. Непродадените работи се рециклираат или донираат. Во куферите се наоѓаат и прилично вредни предмети, од брендирана дизајнерска облека до мобилни телефони и лаптопи.
Продавницата ја посетуваат повеќе од еден милион луѓе годишно, од сите американски држави и повеќе од 40 светски дестинации. „Unclaimed Baggage“ за себе вели дека не е само „продавница со евтини работи“, туку и место каде што заборавеното добива нова шанса. Кој знае, можеби некогаш и стариот сопственик ќе ја пронајде таму својата одамна заборавена работа?
