Најголемиот божиќен базар во Европа ги отвори своите врати, но нема да го најдете во популарните адвентски дестинации како Австрија, Франција или Германија. Тој е сместен во Крајова, живописен град на југозападот на Романија, и се простира на импресивни 280.000 квадратни метри, што го прави најголем на континентот според површина.
Минатата година бил прогласен и за втор најдобар божиќен саем во Европа, веднаш по оној во Гдањск, според изборот на порталот „European Best Destinations“, пишува „Daily Mail“.
Зимска бајка во срцето на Романија
Саемот, кој трае од средината на ноември до почетокот на јануари, секоја година го претвора градот во блескава зимска бајка со милиони светкави светилки и десетици атракции. Целото искуство е поделено на четири тематски зони, вклучувајќи го Дедовото село, меѓугалактичката област и зоната инспирирана од бајката Убавицата и ѕверот.
Во повеќе од 90 рачно насликани куќички се продаваат разни локални ракотворби, подароци и празнични деликатеси како медењаци, мититеи – традиционални колбаси на скара, варено вино и туица, бистра сливова ракија. Главните атракции, како што се лизгалиштето, панорамското тркало и највисоките санки на Дедо Мраз во Источна Европа, се распоредени по историските градски плоштади и околните улици.
Цени и практични совети
Влезот на саемот е бесплатен, но за возења како мал ролеркостер и панорамско тркало потребно е да се издвојат од 4 до 6 евра. Посебна атракција е Лифтот на Дедо Мраз, во кој најмладите можат да ја слушнат пораката од Дедо Мраз, а цената на возењето е околу 10 евра. Според порталот „Romania Experience“, многу опции за храна и пијалаци на саемот се релативно достапни: чаша варено вино чини 2 евра, традиционален романски колбас 1,40 евра, а парче колач „chimney cake“ чини 5 евра. Иако некои продавачи прифаќаат картички, се препорачува плаќање во готово, особено за помали износи.
Единствениот недостаток на посетата на Крајова помеѓу ноември и јануари е острата континентална зима, со ноќни температури во декември кои паѓаат до -2°C. Мразот и снегот се вообичаени, затоа на посетителите им се советува да се облечат топло и да понесат многу термо облека, капи, шалови, ракавици и квалитетни чизми. „Убаво е, но студено. Ги советуваме посетителите да се облечат топло за да може да остане надвор со часови, да се лизга на мраз, да се шета по штандовите и да ја впива атмосферата, без да мора секои 20 минути да се сокрива внатре за да се стопли“, наведуваат од „Ski Vertiga“, платформа специјализирана за скијачки и зимски дестинации.
Една од топ дестинациите на Инстаграм и ТикТок оваа зима
Божиќниот саем во романската Крајова последните години сè почесто се вбројува меѓу најфотогените адвентски базари во Европа – пред сè поради големината, осветлувањето и уредувањето на голем дел од градскиот центар.
ТикТок веќе е полн со видеа.
