Судот во Истанбул донел ретка пресуда според која поранешен сопруг мора да ѝ плаќа на својата поранешна сопруга 10.000 турски лири (околу 180 фунти) на секои три месеци за таа да се грижи за нивните две мачки.
Оваа одлука е дел од пресудата за развод и може да послужи како преседан за идните договори за грижа за домашни миленици.
Во текот на следните десет години, Бугра Б. финансиски ќе ги издржува мачките, кои ќе живеат со неговата поранешна сопруга Езги Б. Плаќањата ќе се зголемуваат секоја година во согласност со Индексот на потрошувачки цени.
Парот се развел по две години брак поради „тешка некомпатибилност“. Покрај издршката за мачки, поранешниот сопруг ќе треба да ѝ исплати и 550.000 лири (околу 10.000 фунти) на поранешната сопруга.
Според турскиот закон, домашните миленици се третираат како подвижен имот, а неодамнешните пресуди им дозволија на судовите да одобрат договори за старателство, грижа и финансиска поддршка за животните по разводот. Овој случај е особено значаен бидејќи воведува структурирана, долгорочна финансиска поддршка за домашни миленици.
Инаку Турција има популација од милиони напуштени животни, вклучувајќи околу четири милиони улични кучиња. Во јули минатата година, парламентот донел закон за сместување на напуштени кучиња во засолништа и покрај критиките од опозицијата. Новите прописи предвидуваат дека кучињата што покажуваат агресивно однесување или страдаат од неизлечиви болести ќе бидат еутанизирани.
Слични случаи се регистрирани и во други земји. Во Индија, еден пар се развел бидејќи нивното куче и мачка не можеле да живеат заедно. Парот бил подложен судски пропишана терапија, а за време на советувањето, сопругата тврдела дека кучето на нејзиниот сопруг ја нападнало и малтретирало, правејќи го животот на нејзината мачка неподнослив.
