Во срцето на англиската покраина Лејк Дистрикт се крие ова волшебно село што ги враќа посетителите во некое поедноставно и поспокојно време. Со своите камени улички, традиционални бели куќи и улици без автомобили, Хокшед изгледа како место на кое времето застанало.

Легендарни жители и книжевно наследство

Најпознатата жителка на селото, како и негова најголема заштитничка, била писателката Беатрикс Потер, авторката на познатата детска приказна за Петар Зајчето. Таа купила голем имот во околината на Хокшед откако се вљубила во адвокатот Вилијам Хилис, и станала истакнат член на локалната земјоделска заедница. Потер соработувала со организацијата „National Trust“ за да го зачува автентичниот пејзаж на регионот.

Во Хокшед живеел и познатиот поет Вилијам Вордсворт, кој го посетувал селското училиште уште од 1779 година.

Село без автомобили — оаза на мир и убавина

Центарот на Хокшед, со своите тесни, свиени улички и камени премини, е целосно затворен за сообраќај, што дополнително придонесува за неговиот спокој. Опкружено со неверојатни природни пејзажи, селото е совршена почетна точка за љубителите на активности на отворено.

Во околината има бројни пешачки и велосипедски патеки, како и можности за водени спортови на блиските езера. Меѓу најпопуларните рути се патеката на скулптури низ шумата Гриздејл и прошетката до Тарн Хоус — еден од најубавите природни бисери во регионот Лејк Дистрикт.

Англиска традиција на секој чекор

По активен ден, гладот и жедта може да се смират во некоја од четирите шармантни селски гостилници, меѓу кои најпозната е „The Queen’s Head“. Оваа историска гостилница, која е отворена и за кучиња, ги пречекува посетителите уште од 17 век, со пукање на оганот во камините, домашно пиво и вкусна храна.

Локални специјалитети се џемовите и сосовите „Hawkshead Relish“, како и прочуените меденки „Ginger Grasmere“.

Време што застанало

Со својот спокоен ритам, совршено сочувани куќи и автентична атмосфера, Хокшед претставува жив споменик на старата Англија. Многумина велат дека прошетката низ селото е како чекор назад во романтична, потивка верзија на земјата.

Хокшед вреди да се посети поради неговата историска автентичност, книжевно наследство и уникатна локација – сместен е во еден од најубавите региони на Англија.

Иако центарот на селото е целосно затворен за автомобили, на периферијата има голем паркинг со наплата, а до него води јавен превоз, вклучувајќи ја и автобуската линија 505, што го поврзува со блиските градови Амблсајд, Конистон и Виндермер, пренесува "Mirror".