Новиот глобален список на најпријателски градови во светот, објавен од порталот „Time Out“, покажува дека срдечноста на локалното население значително ја обликува доживувачката на дестинацијата и често останува она што најдолго го паметиме.

Во истражувањето учествувале повеќе од 18 000 луѓе – апсолутниот победник е Порто

Во големото истражување учествувале повеќе од 18.000 жители на градови ширум светот, а нивната задача била едноставна – да оценат колку нивниот град е пријателски настроен и колку посетителите се чувствуваат добредојдени таму. Резултатите изненадиле многумина, бидејќи на врвот на листата се најдоа градови кои можеби не се меѓу најпосетените, но очигледно се меѓу најтоплите по дух.

Апсолутен победник е Порто во Португалија, град кој неговите жители со причина го опишуваат како најпријателско место во светот. Дури 85 отсто од испитаниците рекле дека во Порто владее срдечност и чувство на заедништво, што, велат многумина, се чувствува на секој чекор. Овој живописен град на брегот на реката Доро со години освојува награди, а неговите жители се познати по опуштениот начин на живот, добрата храна и искреното гостопримство.

Шпанија води на листата

На второто место се наоѓа Билбао во Шпанија, а веднаш зад него е колумбискиот Меделин, град кој во последното деценија се претворил во вистински симбол на оптимизам и промена. Денес, Меделин зрачи со живописна енергија, разновидна гастрономија и богат ноќен живот, а неговите жители се познати по топлината, веселиот дух и искреното гостопримство.

Топ десет го заокружуваат градовите од различни краеви на светот, од Кејп Таун и Лагос до Брајтон, Лисабон и Чикаго, што јасно покажува дека топлината и отвореноста немаат граници. Меѓу првите дваесет се издвојува особено Шпанија, која со дури четири града – Билбао, Мадрид, Валенсија и Севиља – го носи признанието за најпријателска земја во Европа. Можеби тајната е во климата, можеби во „тапас“ културата, но едно е сигурно: Шпанците навистина знаат како да му посакаат добредојде на секого.

Изненадување на врвот...

Интересно е што на листата се најдоа и градови од земји кои ретко се поврзуваат со срдечност, како Абу Даби, Дубаи и Ханој. Ова покажува колку светските метрополи се менуваат и сè повеќе се отвараат кон посетителите. Без разлика дали е насмевка на минувач, краток разговор со продавач или едноставен гест на помош, токму тие мали работи ја прават разликата меѓу градот што само го посетувате и оној што засекогаш ќе остане во вашето срце.

Ако верувате на ова истражување, најпријателските градови во светот не се нужно најбогатите или најпознатите, туку оние каде луѓето сè уште имаат време да застанат, да ве погледнат во очи и искрено да се насмевнат.