„Google Japan“ има долга традиција на експериментирање со необични и иновативни хардверски концепти – а сега продолжува во истиот дух со својот најнов проект на тастатура: „Gboard Dial Version“.
Дизајнот на оваа необична тастатура целосно се оддалечува од традиционалниот "QWERTY" распоред. Компанијата ја замислила како низа бројчаници слични на оние кај старите ротирачки телефони, кои се користат за внесување текст.
Овој формат на тастатура е омаж на времето на аналогните телефони, кога корисниците внесуваа броеви со физичко вртење на бројчаникот и чекање тој да се врати во почетна положба. Главниот инженерски предизвик бил како да се прилагоди систем кој првично служел само за десет цифри (0 – 9) така што сега ќе поддржува цел спектар знаци потребни за современа компјутерска тастатура, пренесува „Android Headlines“.
Решението што го нуди „Gboard Dial Version“ е модуларен систем со повеќе бројчаници. Уредот содржи неколку ротирачки точки, со што на корисниците им се овозможува да имаат посебни бројчаници за букви, функциски команди и модификаторски тастери. Дури и основниот тастер „Enter“ добива форма на ротирачки бројчаник, што го прави целиот процес на пишување целосно механички и заснован на вртење.
Овој проект не е комерцијален производ. Наместо тоа, претставува „open-source“ иницијатива што придонесува за заедницата на љубители на хардвер, а „Google“ ги направи плановите за „Gboard Dial Version“ јавно достапни на „GitHub“, обезбедувајќи детална документација за сите кои сакаат сами да ја изградат тастатурата.
Заинтересираните можат да ги преземат потребните датотеки за 3D печатење на физичките делови, како и шемите за поврзување на жиците.
