Во случај на руска закана само кралот има поголема моќ од овој шеф на гасна компанија.
Џон Батерворт е човекот кој има задача да помогне во заштитата на земјата доколку некогаш се случи голем напад врз британскиот енергетски систем.
Како раководител на „National Gas“ тој надгледува илјадници километри преносни цевководи – клучна мрежа од цевки под притисок што носат гас до електрани, тешка индустрија и преку локални дистрибутери, до милиони британски домови, пишува Политико.
Тоа е неговата секојдневна работа.
Но, доколку Британија некогаш се соочи со криза во снабдувањето со гас, Батерворт би имал широки овластувања за управување со домашните текови на гас – вклучително и, доколку е потребно, исклучување на фабриките, електраните, па дури и домовите – за да ги одржи резервите за болниците и другата критична инфраструктура.
Тоа го става на чело на националните напори за подготовка на земјата за можни напади врз британските енергетски извори од непријатели како Русија на Владимир Путин.
Во таква ситуација, на владата би ѝ требала директна кралска одлука (Order in Council) – законски декрет лично одобрен од монархот – за да го надвладее Батерворт, кој во својата дополнителна, помалку позната улога дејствува како национален координатор за вонредни состојби во гасната мрежа.
„Европа стана малку поопасно место, нели?“ рече Батерворт, гасен инженер по професија, кој ја започнал својата кариера на 17-годишна возраст.
„Руската инвазија на Украина и нејзините неодамнешни упади во земјите-членки на НАТО ја ставија Европа во состојба на висока готовност. Русија повеќе пати покажуваше во Украина дека ја гледа енергетската инфраструктура како „цел“, додаде Батерворт.
Според него, снабдувањето со енергија на Велика Британија денес е поранливо на потенцијални противници отколку што беше во минатиот век.
