Брачен пар од Њу Орлеанс во својот двор открил околу 1.900 години стар римски надгробен споменик посветен на морнарот Секстус Конгениј Верус, што предизвика напори за негова репатријација во Италија.
Антропологот од Универзитетот Тулејн, Даниела Санторо и нејзиниот сопруг, Арон Лоренц, ја пронашле мермерната плоча додека го чистеле дворот, пренесе „Гардијан“.
Натписот на латински јазик укажувал дека станува збор за римска реликвија, по што тие контактирале со експерти од Универзитетот во Њу Орлеанс и колешка од Тулејн, кои заедно со професор од Инсбрук го потврдиле нејзиниот идентитет и поврзаноста со исчезнатиот експонат од градскиот музеј Чивитавекија во Италија.
Музејот Чивитавекија, кој претрпел голема штета за време на сојузничкото бомбардирање во 1943 и 1944 година, потврди дека споменикот се совпаѓа со описот на изгубениот артефакт. Тој го предаде случајот на тимот за уметнички криминал на ФБИ поради подготовка за репатријација.
Истражувачите се обиделе да утврдат како споменикот стигнал до Њу Орлеанс, но точната рута е непозната. Се смета дека можеби бил донесен во 20 век, најверојатно по Втората светска војна, кога американските сили биле во Италија.
