Македонската одбојкарска репрезентација вчера ги доби противниците за претстојното европско првенство, па по ждрепката во Бари стана јасно дека ќе има незгодни противници како Бугарија, Полска, Украина, Португалија и Израел.
Нашите „спартанци“ ќе играат во Варна, а капитенот Никола Ѓорѓиев смета дека иако добивме тешка група, тоа не значи дека тој и неговите колеги нема да притискаат за што подобар резултат на престижниот турнир.
– Македонија на ова Европско првенство влегува без еуфорија и големи очекувања како што беше во 2023 кога бевме организатори, но имавме среќа и во ждрепката, и во групата имавме две репрезентации кои беа со послаб ранкинг од нас.
– На ова ЕП Македонија влегува како најслабо рангирана селекција и верувам дека сите противници во групата на нас гледаат како на тотален аутсајдер. Добивме тешка група со два изразени фаворита – Бугарија и Полска. Украина, особено Португалија, која играше во осминафиналето на СП и ја елиминираше Куба и Израел се противници со кои ќе водиме голема битка и никој не може да ни забрани да сонуваме за осминафинале. Само да сме живи, здрави и сплотени.
– На ЕвроВолеј 2026 ќе влеземе со една поинаква ‘математика’ – да си ја играме нашата игра и да си ја гледаме нашата работа и да сонуваме. Искусни сме, веќе имаме три ЕП зад нас и знаеме како е и да се победува и да се губи. На претходното ЕП игравме и осминафинале и од тоа имаме искуство.
– Напоменав дека групата е тешка, но имаме шанси за нешто историско. Без еуфорија, со многу работа и посветеност и да бидеме најдобри кога ќе биде најпотребно. Потешко можеше, а можеше да биде и полесно, но самото тоа што сме на уште едно ЕП носи големо задоволство, вели Ѓоргиев за официјалната интернет страница на нашата одбојкарска федерација.
