Речиси две недели по стартот на продажбата, новите „iPhone 17“, „iPhone 17 Pro“ и „iPhone 17 Pro Max“ бележат исклучително добри резултати на пазарот. Аналитичарите наведуваат дека подолгите рокови за испорака на официјалниот сајт „Apple Store“, како и податоците од синџирот на снабдување, се знак дека побарувачката ги надминала очекувањата.
Ултра-тенкиот „iPhone Air“ засега не го следи тој тренд и бележи помала популарност кај купувачите. Сепак, „Morgan Stanley“ очекува дека „Apple“ наскоро ќе го зголеми производството на моделите од серијата „iPhone 17“. Во втората половина на 2025 година производството би можело да порасне на повеќе од 90 милиони единици, во однос на сегашните 84 до 86 милиони.
„Apple“ планира раст на производството и ново поглавје
„Morgan Stanley“ ја зголеми целната цена на акциите на „Apple“ на 298 долари, додека моменталната цена изнесува околу 256 долари. Сепак, аналитичарите сметаат дека сегашната вредност веќе ја одразува силната побарувачка за серијата „iPhone 17“, па за понатамошен раст очекуваат уште поголем скок на продажбата.
Аналитичарите се особено оптимистични за периодот 2026 и 2027 година, бидејќи се очекува „Apple“ во септември наредната година да го претстави својот прв преклоплив iPhone. Тој модел би можел да донесе најголема иновација на компанијата во последните неколку години и дополнително да ја зголеми продажбата.
