Неговите жртви се идентификувани како Едријан Долби (53) и Мелвин Кравиц (66). И двајцата биле членови на еврејската заедница во Манчестер. Тројца други еврејски верници се пренесени во болница со тешки повреди – еден со убодни рани, а друг повреден од удар со автомобил.

Се верува дека Ал Шами бил татко, според фотографија што минатата година ја споделил неговиот татко, на која држи бебе в раце. Објавата на Фејсбук била проследена со натпис: „Прекрасно добредојде за внукот“.

Тој не бил предмет на владината програма за превенција од тероризам „Prevent“, ниту пак ѝ бил познат на полицијата или безбедносните служби, потврди министерката за внатрешни работи Шабана Махмуд во петокот.

Крвав напад

Ал Шами чиј идентитет сè уште официјално не е потврден – го изврши смртоносниот напад на Јом Кипур, најсветиот ден во еврејскиот календар.

Прво, со својот црн „Kia Picanto“ удрил во група собрани еврејски верници во 9:31 часот, а потоа излегол од возилото и започнал да „прободува секого што можел да му се приближи“.

Обидот за влез во синагогата бил спречен благодарение на рабинот Даниел Вокер и волонтерите кои брзо ги заклучиле вратите. Според полицијата, 35-годишниот маж носел елек за кој првично се мислело дека содржи експлозив, но подоцна било утврдено дека не е функционален.

Во обидот да се спречи напаѓачот, татко на три деца, Јони Финли, бил повреден – веројатно од шрапнел кога полицијата пукала кон Ал Шами. Бил опериран и се наоѓа во стабилна состојба.

Истовремено, полицијата уапсила двајца мажи и една жена под сомнение дека планирале терористички напад, како дел од истрагата за можни соучесници.

Видео-снимки на Јутјуб го прикажуваат Ал Шами и неговите двајца браќа како си играат во дворот од куќата на улицата Кресент роуд, на околу 20 минути пеш од синагогата која тој ја нападна. Овие снимки ги споделил таткото на напаѓачот, Фараџ ал Шами за кого се верува дека е трауматолог и работел за неколку невладини организации во воени зони ширум светот.

Се наведува дека семејството живее во Манчестер најмалку 30 години – и во моментов се наоѓаат во Прествич, на околу два километри од местото на терористичкиот напад.

Ал Шами наводно работел како наставник по англиски јазик и компјутери.

Не е познато дали дошол во Велика Британија како барател на азил или преку друг имиграциски канал, како што е „спојување на семејства“, кое им овозможува на странци да се придружат на роднини што веќе живеат во Британија.

Стармер итно се врати од Копенхаген

Смртоносниот напад беше осуден од целото политичко и верско раководство. Главниот рабин, сер Ефраим Мирвис, изјави дека ова е „ден кој се надевавме дека никогаш нема да дојде, но од кој се плашевме дека ќе дојде“, зборувајќи за „немилосрдниот бран на антисемитска омраза“.

Премиерот, сер Кир Стармер, итно се врати од Копенхаген, претседаваше со состанокот на комитетот Кобра и вети засилување на безбедноста во еврејските заедници. „Ова беше терористички напад врз Евреи, само затоа што се Евреи“, изјави тој, изразувајќи восхит од брзата реакција на полицијата и херојството на оние кои спречија поголема трагедија.

Од Израел, премиерот Бенјамин Нетанјаху го опиша масакрот како „варварски напад“ и увери дека „нашите срца се со семејствата на жртвите“. Министерката за внатрешни работи, Шабана Махмуд, изјави дека е „шокирана од антисемитскиот терористички чин“, нагласувајќи дека сите детали ќе бидат темелно истражени.