Овој пат не станува збор за SUV, ниту за лимузина.

Луксузните MPV модели се исклучително популарни во Кина, но и на други пазари каде купувачите преферираат пространи алтернативи на традиционалните лимузини и SUV-возила од високата класа. Сè повеќе производители сакаат да имаат свој претставник во овој сегмент, меѓу кои „Lexus“ и „Volvo“. Во Кореја, таа улога ја исполнува „Kia Carnival“ во верзијата Hi Limousine, која сега е темелно унапредена.

„Carnival Hi Limousine“ првпат беше претставен на крајот на 2020 година како најпрестижна изведба. Не се издвојува само со луксузната опрема, туку и со елемент кој на прв поглед изгледа како кровен багажник. Всушност, станува збор за продолжен кровен дел дизајниран да ја зголеми внатрешната висина и да овозможи сместување на дополнителна опрема.

Во новата моделска година го презема стилското и технолошко освежување од редизајнираниот „Carnival“, како и од другите модели на марката. За првпат пристигнува и со хибриден погон.

Врвен луксуз

Купувачите можат да избираат меѓу неколку опции – од најевтината со девет седишта, до најпрестижната со само четири седишта. Изведбата со четири седишта и ниво на опрема "Signature" е најраскошна, нудејќи огромни фотелји со потпирачи за нозе, можност за спуштање на потпирачите и функција за масажа. Дополнително, вклучува специјален масажер за стапала и преграда за чевли.

Она што е уште поважно, „Kia“ ја подобри удобноста на возењето кај верзијата со четири седишта преку специјални амортизери, преработен суспензиски систем и понизок распоред на седишта. Патниците на задните седишта располагаат со 21,5-инчен екран монтиран на кровот со освежена графика, 7-инчен контролен екран на допир во централната конзола, безжични подлоги за полнење, преклопливи масички, закачалка за палта и мини-фрижидер.

Нов аудио-систем од „Bose“ со 12 звучници е достапен како опција, додека „ѕвезденото небо“ на кровот и амбиенталното осветлување имаат можност за меморирање на поставките.

V6 како основа

Понудени се два погона. Основата е 3,5-литарски V6 бензински мотор со 294 коњски сили, а сега му се придружува и 1,6-литарски самополначки хибрид со моќност од 245 коњски сили. Дизел-опција овој пат не е предвидена.

Одлична цена

Новата „Kia Carnival Hi Limousine“ веќе е достапна за нарачка во Кореја. Почетната цена за "Noblesse" опремата и верзијата со девет седишта изнесува 42.390 евра. Најскапата е четвороседот "Signature" со хибриден погон, кој чини 65.500 евра. Интересно, V6 верзијата е околу 3.000 евра поевтина од послабиот хибрид.

За крај, вреди да се нагласи дека основниот „Carnival“ во Кореја стартува со цена од околу 22.100 евра.