За многу од тинејџерите „Snapchat“ е омилена и најчесто користена социјална мрежа. Но, како што тоа е случај и со останатите социјални мрежи и платформи, на неа има многу опасности за кои младите не се свесни.

Минатата година во САД против оваа социјална мрежа била поднесена тужба во која се тврди дека станува збор за најопасната социјална мрежа за младите, а во фокусот на тужбата биле сексуалните предатори кои ги има во голем број.

Но, тие не се единствениот проблем. Тоа го покажало и неодамнешното истражување на данската организација „Digital Ansvar“ која промовира одговорен дигитален развој, а кое покажало дека на „Snapchat“ денес младите без проблем можат да купат дрога, а дури не мора ни да бараат такви профили туку самиот алгоритам им ги предложува.

Направиле лажни профили на 13-годишник

За цел на истражувањето, данските истражувачи направиле лажни профили на 13-годишник кои без проблем на таа мрежа стапиле во контакт со лица кои продаваат дрога. Она што е прилично неверојатно е што нивните кориснички имиња ги содржеле зборовите како „coke“, „weed“ и слични, па „Snapchat“ поради тоа не ги блокирал.

Откако екипата од истражувачите пријавила такви 40 профили, се изненадиле кога виделе дека се отстранети само 10 од нив додека пак пријавите за останатите 30 профили биле одбиени.

Како уште еден голем проблем од организацијата го нагласиле тоа што алгоритмот на оваа социјална мрежа понекогаш таквите профили кои продаваат дрога сам им ги препорачува на младите.

„Како дете или млада личност воопшто не треба сами да барате такви профили, може директно да ви ги препорача „Snapchat“. Тоа е исклучително проблематично“, предупредиле од организацијата.

Нулта толеранција на дрога?

Иако од социјалната мрежа тврдат дека користат технологија која таквите профили треба да ги блокира, во реалноста не е така. На таа мрежа достапни се бројни профили кои дури во свое име даваат до знаење дека станува збор за дилери.

Од компанијата секако имаат поразлично објаснување. За „The Guardian“ коментирале дека имаат нулта толеранција за продажба на дрога на „Snapchat“ и дека четвртина од профилите кои се спомнати во тој извештај се веќе блокирани.