Во неодамнешна изјава, Хавас, кој е наречен и „крал на пирамидите“ и „Индијана Џонс од реалниот живот“, самоуверено изјави дека точно знае кога ќе се случи крајот на светот.

Но, инсистираше дека тоа никому нема да му го открие.

Поради ова шокантното тврдење многумина се прашуваат дали се шегувал, дали штити некое древно знаење или едноставно ужива во мистеријата.

Познат по својата импресивна кариера, д-р Хавас претходно ја „задевал“ јавноста тврдејќи дека „има и чува информации за кои сè уште не е подготвена“.

Засега, светот ќе мора да продолжи да нагаѓа. Дали се работи за древно пророштво, археолошки докази или само уште едно од драматичните тврдења на Хавас?

Инаку, американските медиуми често го претставуваат како „арогантен, страстен и неуморен археолог“. Д-р Хавас е исто така поранешен генерален секретар на Високиот совет за антиквитети на Египет (2002-2011) и прв министер за антиквитети на Египет (2011).

Тој бил и директор на платото Гиза, а истражувал и археолошки локалитети во делтата на Нил, Либиската пустина и Горниот и Долниот Египет. Во последните неколку години, тој го привлече вниманието на светските медиуми со своите чести појавувања во телевизиски документарци посветени на древната египетска цивилизација.

Тој има самодоверба на човек кој премногу пати докажал дека е во право

Со децении бил шеф на археолошки тимови, држејќи жестоки јавни предавања со самодоверба на човек кој премногу пати докажал дека е во право.

Неодамна држел предавања ширум САД, а неговата турнеја привлече огромни толпи, иако следеше по контроверзното интервју со Џо Роган, кој истото го нарече „најлошиот поткаст што некогаш го направил“.

Реган го опиша познатиот археолог како „човек со ограничени погледи кој бил задолжен за чување на целото знаење“.

Но, тоа не успеа да го оспори неговата импресивна биографија – Хавас водел или надгледувал многу од најзначајните египетски откритија во модерното време: Изгубениот златен град во близина на Луксор, новите гробници во Сакара, идентификацијата на мумијата на кралицата Хатшепсут и неодамнешните скенирања во Големата пирамида во Гиза кои открија мистериозни скриени комори.

Тој, исто така, ги предводел напорите за репатријација на украдени антиквитети и преобликување на египтологијата со Египќаните во центарот.

За време на посетата на САД, новинарите на „Њујорк пост“ го прашале дали некогаш се заморува од зборување за своите откритија?

„Никогаш!… Секое откритие што сум го направил во мојот живот има своја приказна. Последното откритие што го направив „Изгубениот златен град во Луксор“ е големо, важно откритие. Тоа е најголемиот град некогаш пронајден во Египет и за прв пат имаме увид во занаетчиите кои ги правеле храмовите и алатките што ги користеле за време на златното доба. Внатре во градот пронајдовме седум големи кралски работилници каде што правеле статуи, накит, текстил и облека за палатата. Едно од најважните нешта што ги пронајдовме, кое сè уште не е објавено, а штотуку го објавив за време на моите предавања, е името Сменкара“, рече д-р Хавас.

Меѓу другото, тој исто така призна дека обичните луѓе се обидуваат да ги побијат неговите откритија и дека постои маргинално движење кое верува дека вонземјани биле вклучени во изградбата на пирамидите.

На удар од поддржувачите на теоријата дека пирамидите биле изградени од вонземјани

„О да, тие се насекаде и сакаат да сонуваат. Слушајте, не сум против какви било нови откритија. Само покажете ми ги доказите. Секојдневно добивам лути е-пораки од луѓе кои мислат дека ги кријам доказите … Разбирам од каде доаѓаат. Ако за прв пат застанете пред Големата пирамида, сигурен сум дека ќе ви биде тешко да поверувате дека ја изградиле луѓе. Кој би вработил 10.000 работници дневно да работат 28 години за да изградат нешто такво? Делува смешно дури и да се замисли! Но, ова бил национален проект на целата нација“, изјави Хавас.

Тој додаде дека е подготвен да ја прифати теоријата за вонземјани само ако му презентираат докази.

„Ако вонземјаните ги изградиле пирамидите, ќе имало некаква трага во земјата. Со децении копам во Египет и не пронајдов ништо што укажува на нешто друго освен на човечка активност“, истакна археологот.

Во оваа прилика, тој се осврна и на проклетството на фараонот, бидејќи постои цврсто верување дека клетвата на Тутанкамон „убила неколку археолози“.

„Ова е вистинската вистина за проклетството. Кога ќе затворите гробница 3.000 години, а во неа има мумии, ќе има бактерии. Кога ќе ја отворите оваа гробница, бактериите мора да излезат. Има зрачење! Во минатото, археолозите брзаа да ги разгледаат овие гробници и го вдишувале тој нездрав воздух. Го сфатив ова само пред неколку месеци, мора да го оставите новото откритие да дише. Пронајдов запечатен саркофаг 18 метри под земја и кога работниците го отворија, чекав три часа да се проветри и дури тогаш ѕирнав внатре за да истражам“, објасни Хавас.

На крајот, тој истакна дека би сакал да сними проект со Харисон Форд, холивудскиот актер најзаслужен за тоа што ликот на Индијана Џонс стана глобално популарен.

„Се надевам дека Харисон Форд и јас наскоро ќе го имаме нашиот момент. Лесли Грајф, голем холивудски продуцент, сака да снимам серија со Јутјуберот Мистер Бист, но му реков дека ми треба Харисон Форд. Можете ли да го замислите тоа? Д-р Захи Хавас и г. Харисон Форд заедно ги откриваат тајните на Големата пирамида. Милијарди луѓе би се вклучиле. Кој не би сакал да го гледа тоа?“, рече Хавас.